Fyrsta smásagnasafnið hlýtur alþjóðlega Bookerinn

Smásagnasafnið Heart Lamp eftir Banu Mushtaq hlýtur alþjóðlegu Booker-verðlaunin 2025. Deepa Bhasthi þýddi bókina úr tungumálinu kannada sem talað er á Indlandi og er þetta fyrsta bókin þýdd úr því máli sem hlýtur verðlaunin. Er þetta jafnframt í fyrsta sinn sem smásagnasafn er verðlaunað.

Verðlaunin eru veitt árlega verki sem gefið er út í enskri þýðingu og skipta höfundur og þýðandi með sér verðlaunafénu, sem er 50 þúsund pund eða um 8,5 milljónir íslenskra króna.

Heart Lamp er safn 12 sagna sem fjalla um daglegt líf kvenna og stúlkna í samfélagi múslima á Suður-Indlandi. Þær ­birtust í heimalandi höfundarins á árunum 1990 til 2023. Mushtaq er blaðamaður og lögfræðingur og hefur lengi beitt sér fyrir réttindum kvenna, að því er fram kemur á vef verðlaunanna. Frekari upplýsingar má finna á thebookerprizes.com.