Hætt að selja Labubu í Bretlandi eftir slagsmál

Kínverska fyrirtækið Pop Mart hefur hætt sölu á hinum vinsælu Labubu-böngsum í öllum verslunum sínum í Bretlandi eftir slagsmál milli viðskiptavina og of mikla ringulreið sem myndaðist í kringum verslanir.

Frétt af mbl.is

Hvað er Labubu og af hverju eru allir að missa sig?

Ástandið var sérstaklega slæmt í Lundúnum

Ákvörðunin var tilkynnt eftir að mikill fjöldi fólks mætti við verslanirnar til að tryggja sér eintak af böngsunum, sem eru orðnir geysivinsælir meðal almennings og áhrifavalda. Ástandið varð sérstaklega slæmt í Pop Mart-versluninni í Stratford í Lundún, þar sem slagsmál brutust út og viðskiptavinir lýstu aðstæðum sem hræðilegum.

Í yfirlýsingu Pop Mart segir fyrirtækið að það hafi tekið þessa ákvörðun til að tryggja öryggi og vellíðan allra viðskiptavina. Á meðan ástandið er tekið til endurskoðunar verður hægt að kaupa Labubu áfram í gegnum netverslun Pop Mart en ekki í verslunum fyrirtækisins.

Fólk er ekki sátt með fyrirkomulagið

Aðdáendur Labubu hafa brugðist við með reiði á samfélagsmiðlum og margir kenna endursöluaðilum um ringulreiðina, þar sem fólk hefur keypt vörurnar í miklu magni til að selja þær aftur á miklu hærra verði á netinu.

„Það er óþolandi að fólk sé að kaupa marga bangsa til að selja þá dýrt á netinu og eyðileggja upplifunina fyrir okkur hin,“ sagði einn aðdáandi á Instagram.

Pop Mart hyggst koma Labubu aftur í verslanir í júní og vinnur nú að nýju fyrirkomulagi til að tryggja sanngjarnari dreifingu og betri upplifun fyrir viðskiptavini sína.

Hér að neðan má sjá upplifun fólks:

• Blogga um frétt