Brian Wilson látinn
Setja bókamerki
Brian Wilson, ameríski tónlistarmaðurinn og forsprakki hljómsveitarinnar Beach Boys, er látinn, 82 ára að aldri.
Fjölskylda hans greindi frá andlátinu með sorg í hjarta á Instagram.
„Við gerum okkur grein fyrir því að við deilum sorg okkar með heiminum,“ segir jafnframt í færslunni.
Ein áhrifamesta hljómsveit rokksögunnar
Wilson var fæddur í Inglewood í Kaliforníuríki í Bandaríkjunum 20. júní 1942. Hann var einn af stofnendum hljómsveitarinnar Beach Boys, ásamt bræðrum sínum Dennis og Carl, frænda þeirra Mike Love, og skólafélaga Al Jardine.
Hljómsveitin naut gífurlegra vinsælda, sérstaklega á sjöunda áratug síðustu aldar og átti hljómsveitin tíu lög sem náðu í efstu tíu sætin á vinsældaristum frá árunum 1962-1966. Flest þeirra voru skrifuð í heild eða að hluta af Brian Wilson.
Verk hljómsveitarinnar höfðu gífurleg áhrif á rokksöguna og ber þar einna helst að nefna plötuna Pet Sounds sem Bítillinn Paul McCartney sagði að hefði haft mikil áhrif á Bítlaplötuna Sgt. Peppers Lonely Hearts Club Band.
Þessar plötur tróna oft á toppum á listum yfir bestu plötur allra tíma og má þar nefna slíkan lista frá tímaritinu Rolling Stone frá árinu 2003 þar sem Sgt. Peppers var sett í fyrsta sæti og Pet Sound í það annað á lista yfir 500 bestu plötur allra tíma.
Plötur hljómsveitarinnar hafa selst í meira en 100 milljónum eintaka.
Geðrænir erfiðleikar
Wilson átti við mikla geðræna erfiðleika að stríða og misnotaði hann bæði fíkniefni og áfengi er hann leiddi Beach Boys. Endaði þetta með því að hann var rekinn úr sinni eigin hljómsveit árið 1982.
Brian ásamt Beach Boys voru innleiddir inn í frægðarhöll rokksins árið 1988.
Árið 2011 var frægasta „týnda“ plata rokksögunnar, Smile með Beach Boys, gefin opinberlega út, rúmum fjörutíu árum eftir að sturlaður Brian Wilson gekk frá hálfköruðu verki.
Árið 2012 hætti hljómsveitin vegna átaka á milli hljómsveitarmeðlima.
Tónleikar í Eldborg 2016
Brian átti eftir að koma fram á fjölmörgum tónleikum eftir að hann var rekinn úr hljómsveitinni.
Meðal annars flutti hann Pet Sounds plötuna í heild sinni ásamt hljómsveit á tónleikarferðalagi og kom hann fram á Íslandi árið 2016.
Fréttin hefur verið uppfærð.
Segir lóðaskort valda fækkun íbúða í byggingu
Íbúðum í byggingu fækkar um land allt
Reykjavíkurborg og 25 milljóna bílastæðin
Fíkniefnaframleiðslan „keðja um allt land“
Skotin flugu á milli Guðrúnar og Kristrúnar
Kjarnorkukafbátur til hafnar
Yfir 160 manns enn saknað í Texas
Fánarnir verða dregnir upp að nýju