Álagið verið svakalegt

Afturámóti mun bjóða upp á fjórar sýningar og ferna tónleika í sumar, alls um 40 viðburði samanlagt, sem allir fara fram í Háskólabíói eins og í fyrra.

„Það er alveg ástæða fyrir því að við völdum að gera þetta aftur. Við hugsuðum þetta sem stærra prógramm sem myndi halda áfram og lifa og þó að við séum bundin af því að setja aðeins upp leiksýningar núna langar okkur einfaldlega að gera allt sem okkur lystir og dettur í hug í framtíðinni. Það væri lygi að segja að þetta hefði verið létt því álagið var svakalegt en á sama tíma er þetta nokkuð sem við erum tilbúin að gera aftur. Okkur langar að halda áfram og svala þessari þörf sem við finnum svo sterkt fyrir,“ segir Króli og bætir því við að Afturámóti sé svo sannarlega komið til að vera.

„Svo lengi sem fólk heldur áfram að mæta á sýningarnar höldum við ótrauð áfram. Það er líka greinilega þörf fyrir því að taka á móti ungu fólki og veita því pláss til að koma list sinni á framfæri því langstærsti áhorfendahópurinn okkar er ungt fólk, 25 ára og yngri, sem er kannski hópurinn sem er einna erfiðast að ná inn í leikhúsin. Stóru leikhúsin fara ekkert í felur með það hversu erfitt það reynist. Mér finnst það því sýna sig og sanna að um leið og ungt fólk gerir leikhús fyrir ungt fólk mætir unga fólkið.“

Hátt gæðastig í LHÍ

Verkin fjögur sem Afturámóti setur upp í sumar eru Góðan daginn, faggi eftir Bjarna Snæbjörnsson, Þorskasaga eftir Hafstein Níelsson og Ólíver Þorsteinsson, Ber er hver, einstaklingsverkefni Króla úr LHÍ, og Gunnella, einstaklingsverkefni Kötlu Njálsdóttur úr LHÍ. Þrjú síðastnefndu verkin eru öll útskriftarverkefni nemenda úr LHÍ þetta árið en þau eiga það sameiginlegt að sögn Króla að færri komust að en vildu þegar þau voru sett upp.

„Þau voru öll sýnd í litlum sölum, sem tóku undir 100 manns, og hvert þeirra var aðeins sýnt þrisvar sinnum þannig að núna verða þau höfð í stærri mynd þar sem búið er að gera þau tilbúnari fyrir atvinnuleikhús. Það er líka mikilvægt að taka það fram að framleiðslan í Listaháskólanum síðustu ár er búin að vera á svo háu gæðastigi að það nær engri átt,“ útskýrir hann.

Í verkinu Þorskasaga tekst Króli á við hlutverk aðstoðarleikstjóra og dramatúrgs, sem hann segir einstaklega skemmtilegt. „Þorskasaga er kabarettsöngleikur af guðs náð og bestu gerð. Hann fjallar um þorskastríðin þrjú og er frásagnarstíllinn þannig að þorskarnir í sjónum segja söguna og syngja en síðasti söngleikur sem þeir félagar mínir, Hafsteinn og Ólíver, settu upp í Listaháskólanum var einmitt keyptur af Þjóðleikhúsinu og verður settur upp á Stóra sviðinu á næsta leikári, verkið Ormstunga.“

Hvött til að skrifa eigin verk

Inntur út í einstaklingsverkefnið sitt og hvort slík verkefni séu til þess gerð að virkja nemendur sem textahöfunda segir Króli svo vera.

„Á síðasta ári leikaranema er áfangi sem heitir „Leikarinn sem höfundur“, þar sem nemendur eru hvattir til að skrifa eigin verk, og ég fékk tvo mjög góða vini mína með mér í það sem heita Vilhjálmur Bergmann Bragason og Hjalti Rúnar Jónsson. Við erum forfallnir farsaaðdáendur og okkur langaði mikið að skrifa einn slíkan.

Grunnhugmyndin að þessum farsa kemur frá stórleikkonunni Ólafíu Hrönn Jónsdóttur sem lagði það til að ég léki tvíbura. Við settumst svo niður þegar ég var að vinna fyrir norðan í Litlu hryllingsbúðinni og skrifuðum þennan farsa sem fjallar um mann sem er ekkert sérstaklega góður lygari. Hann er í fjárhagskröggum og ætlar að redda sér með því að laga mygluvesen í sameigninni í blokkinni sem hann býr í en það vindur svakalega upp á sig. Við tekur farsakennd atburðarás sem hættir ekki fyrr en allt er komið á aðra hliðina,“ segir hann kíminn.

Hefur meira en nóg að gera

Sjálfur er Króli búinn að skrifa undir árssamning við Þjóðleikhúsið og er þegar byrjaður að æfa Línu langsokk sem frumsýnd verður í september. „Síðan byrja ég að æfa fyrir Ormstungu sem verður frumsýnd í janúar. Þannig að næsta ár hjá mér mun snúast svolítið um þessar tvær sýningar,“ segir hann aðspurður um hvað taki við í haust þegar sýningum Afturámóti lýkur.

„Svo erum við Jói að gefa út plötu núna í júní þannig að ég mun líka gigga í sumar. Einnig erum við Jói og Bergur Þór Ingólfsson að skrifa söngleik fyrir Leikfélag Akureyrar sem verður frumsýndur á þarnæsta leikári svo að ég get alla vega ekki kvartað yfir því að vera verkefnalaus,“ segir hann og hlær.

Leikurinn og söngurinn virðast því samofnir þættir í lífi Króla enda hefur hann notið sín vel í hlutverkum þar sem reynir á hvort tveggja, eins og í Litlu hryllingsbúðinni og Legi, útskriftarsýningu leikaranema.

En hvert skyldi draumahlutverkið vera? „Mér líður alla vega vel þegar ég geri hvort tveggja. Það er líka í þægindarammanum mínum að geta nýtt báðar þessar listrænu hliðar á mér, sönginn og leiklistina. Ég er samt sem áður opinn fyrir öllu og mun aldrei loka neinum dyrum nema hafa prófað áður. Mér líður bara svolítið vel í óvissunni og óreiðunni, þar finn ég mig vel.“