Forsyth kveður

Hann fæddist árið 1938 í Kent og var einmana einkabarn sem leitaði í bækur sem lýstu æsilegum ævintýrum. Sautján ára gamall gekk hann í flugherinn og var í hópi yngstu flugmanna í sögu hersins. Hann starfaði sem blaðamaður, var um tíma fréttaritari í París, Berlín og Biafra. Hann skrifaði fyrstu bók sína The Biafra Story um reynslu sína þar. Hann vann fyrir bresku leyniþjónustunnar og sinnti þeim störfum í tuttugu ár. Hann var mikill tungumálamaður og fimmtán ára gamall talaði hann reiprennandi þýsku og frönsku og seinna lærði hann rússnesku og spænsku.

Útgefendur sögðu nei

Fyrstu skáldsögu sína, Dag Sjakalans skrifaði hann á rúmum mánuði á gamla ritvél, en hann sagði að rannsóknarvinnan hefði tekið tólf ár. Skrifin voru tilraun til að bjarga fjárhagnum. Fjórir útgefendur höfnuðu bókinni en sá fimmti veðjaði á verkið. Bókin kom út árið 1971 og segir frá launmorðingja sem hyggst ráða Charles de Gaulle Frakklandsforseta af dögum. Forsyth talaði við menn sem höfðu atvinnu af því að falsa vegabréf og hitti launmorðingja sem lýsti aðferðum sínum fyrir honum. Í bókinni fær launmorðinginn fæðingarvottorð og vegabréf í nafni látins barns. Þetta var nokkuð sem Forsyth lét reyna á í raunveruleikanum og honum tókst að útvega sér skilríkin. Hann lýsti þessari aðferð nákvæmlega í bókinni og glæpamenn nýttu sér þær lýsingar til að útvega sér þessi vottorð. Aðferðin varð þekkt undir nafninu Sjakaladagssvikin.

Dagur Sjakalans varð metsölubók og sögð vera meistaraverk. Bókin varð að frábærri kvikmynd árið 1973 með Edward Fox í aðalhlutverki. Myndin er í 74. sæti yfir bestu bresku kvikmyndir 20. aldar. Sjónvarpsþættir, með Eddie Redmayne, gerðir eftir sögunni voru sýndir árið 2024 og hlutu mikið lof.

Forsyth lagði alla tíð mikla áherslu á heimildavinnu en neitaði að nýta sér netið við þá vinnu. Rannsóknarvinnan, sem hann hafði unun af, tók mun meiri tíma en skrifin sjálf, um átján mánuði, en hann var rúman mánuð að skrifa bók, skrifaði yfirleitt 4.000 orð á dag, alltaf á ritvél. Í bókum sínum opinberaði hann ýmsar aðferðir sem njósnarar nota við störf sín.

Edward Fox í hlutverki sínu í Degi Sjakalans.

Tapaði aleigunni

Fyrri eiginkona hans var fyrirsæta, Carole Cunningham, og þau eignuðust tvö börn en skildu eftir fimmtán ára hjónaband. Seinni eiginkona hans, Sandy Molloy, var handritahöfundur og starfaði um tíma sem aðstoðarkona leikkonunnar Elizabeth Taylor. Hún var tíu árum yngri en Forsyth. Hjónaband þeirra var hamingjuríkt en síðustu árin sem Sandy lifði varð hún háð verkjalyfjum og fíknin eyðilagði heilsu hennar og varpaði dimmum skugga á hjónabandið. Loks var Sandy flutt á börum af fallegu heimili þeirra í Buckinghamshire og á hjúkrunarheimili. Forsyth sagði að hún hefði verndað hann meðan hann skrifaði metsölubækur sínar en síðan hefðu hlutverkin snúist við og það hefði orðið hans hlutskipti að vernda hana. Sandy lést á síðasta ári.

Forsyth auðgaðist mjög af skrifum sínum en tapaði svo að segja aleigunni vegna vondrar fjárfestingar og svika manns sem hann taldi vera vin sinn. Aðferð hans til að endurheimta auð sinn hentaði honum vel; hann skrifaði fimm bækur á fimm árum og varð aftur forríkur.

Hann var harður andstæðingur Evrópusambandsins og sannfærður konungssinni og vitanlega fékk hann konunglega orðu fyrir ritstörf sín.

Sjálfsævisaga hans kom út árið 2015. Heimildarmynd um hann verður sýnd á BBC1 seinna á þessu ári. Um svipað leyti kemur út bókin Revenge of Odessa, framhald Ódessaskjalanna, sem Forsyth skrifaði ásamt Tony Kent.