Íslenska söngkonan Laufey Lín flutti lagið You’ll Never Walk Alone í lítilli kirkju í Liverpool í gærkvöldi til heiðurs knattspyrnumanninum Diogo Jota og bróður hans, André Silva, sem létust báðir í hörmulegu bílslysi á Spáni fyrr í vikunni.
Slysið átti sér stað þegar Jota, sem hafði leikið með Liverpool frá árinu 2020, var á leiðinni aftur til Englands eftir sumarfrí í Portúgal ásamt bróður sínum.
Tíðindin hafa valdið miklum harmi víða í knattspyrnuheiminum. Jota var aðeins 28 ára gamall og lætur eftir sig eiginkonuna Rute Cardoso, en þau höfðu gift sig aðeins tíu dögum fyrir slysið. Þau höfðu verið saman frá unglingsaldri og eignuðust þrjú börn saman.
Silva var aðeins 25 ára og var einnig atvinnumaður í knattspyrnu þar sem hann spilaði fyrir portúgölsku deildina. Samhliða knattspyrnuferlinum lærði Silva viðskiptafræði og hafði nýlega útskrifast áður en hann lést. Þeir bræður höfðu einnig stofnað fyrirtæki saman.
Liðsfélagar Jota hjá Liverpool hafa lýst yfir mikilli sorg og hefur félagið ákveðið að heiðra minningu hans með táknrænum hætti. Félagið ætlar að festa númer hans, 20, í sessi til að tryggja að minning hans lifi áfram á Anfield. Ekki hefur verið ákveðið endanlega hvort númerið verði alfarið tekið úr umferð en ljóst er að enginn annar mun bera það á næstunni.
Flutningur Laufeyjar snerti marga en myndband af henni syngja lagið hefur fengið mikla athygli á samfélagsmiðlum þar sem stuðningsmenn og aðrir minnast þeirra bræðra.
Hér að neðan má sjá flutning Laufeyjar í Liverpool:
@laufey Sang this special song tonight in honor of Diogo Jota and Liverpool ♥️
♬ original sound - laufey