„Mig langaði til að hverfa“
Guðrún Sigríður Sæmundsen
Setja bókamerki
Í grein í breska Vogue frá júní 2015 er ástæðu þess að ofurfyrirsætan Christy Turlington ákvað að hætta í bransanum og fara í nám uppljóstrað. Það var ekki einungis fróðleiksþorsti sem dró hana inn á nýja braut heldur hafði hún hætt að reykja og var farin að bæta aðeins á sig. Fyrir vikið hlaut hún gagnrýni innan tískuheimsins í París þar sem hún starfaði. Þegar henni var vísað á dyr af einni sýningu sem hún átti að taka þátt í gaf það henni enn ærnari ástæðu til að fylgja innsæinu.
Þetta var árið 1996 og hóf Turlington B.A.-nám í trúarbragðafræði og austrænni heimspeki, þá 27 ára gömul. Á þessum tíma var hún ekki aðeins fyrirsæta heldur ein af ofurfyrirsætunum eða „the supermodels“ sem virtust eiga heiminn.
Byrjaði að reykja 13 ára
Turlington er fædd í Walnut Creek í Kaliforníu 2. janúar 1969, miðjubarn af þremur systrum. Faðir hennar, Dwain Turlington, var flugmaður hjá Pan Am-flugfélaginu og móðir hennar María Elizabeth var flugfreyja frá El Salvador. Turlington ólst upp í rómversk-kaþólskri trú og hélt hún í trúna fram á fullorðinsár.
Sem unglingur var hún ekki mjög áberandi og eflaust eins og aðrir bandarískir unglingar í San Fransisco, sem héngu á McDonald's. Hún byrjaði að reykja aðeins 13 ára gömul og var farin að reykja pakka á dag þegar hún var aðeins 16 ára.
Turlington var uppgötvuð af ljósmyndaranum Dennie Cody þegar hún var á hestbaki í Miami í Flórída þar sem faðir hennar starfaði um tíma. Hún hóf módelstörf meðfram skóla á aldrinum 14-16 ára og í sumarvinnu. Árið 1987, þegar hún var 18 ára, flutti hún til New York og fór þá á fullt í módelstörfin.
Niðurlægingin
Turlington hefur verið gift leikaranum og leikstjóranum Ed Burns í 21 ár. Þau kynntust á góðgerðarsamkomu árið 2000 og giftu sig í júní 2003. Þau eiga saman dótturina Grace, sem er 21 árs, og soninn Finn, 19 ára.
Í viðtali við The Philadelphia Inquirer í maí 2014 talaði Turlington um gæðin sem felast í foreldrahlutverkinu, sem hún sagðist vonast til að börnin hennar fengju einnig að upplifa. Í viðtalinu sagði hún einnig: „Börnin mín eru heppin að eiga tvær heilbrigðar, ástríðufullar manneskjur sem foreldra sem elska og virða hvor aðra sem jafningja.“
Í heimi frægðar er foreldrahlutverkið þó ekki alltaf tekið út með sældinni og því fékk Turlington að kynnast þegar hún var stödd á körfuboltaleik sonar síns. Andstæðingar sonar hennar höfðu í fórum sínum nektarmynd af Turlington sem þeir létu ganga sín á milli.
„Ég var hissa á að þetta hefði ekki gerst fyrr,“ sagði hún í forsíðuviðtali við Harper's Bazaar í apríl 2024. „En á sama tíma, var ég alveg: Þetta er svo dónalegt!“
Atvikið varð að mun stærra máli þegar skóli sonarins blandaðist í málið og sagði Turlington í viðtalinu: „Mig langaði til að hverfa.“
Ein af þeim allra bestu
Turlington var ansi áberandi á níunda og tíunda áratugnum. Hún hefur komið fram í herferðum fyrir vörumerkin Calvin Klein, Chanel, Marc Jacobs, Donna Karan, Versace og Max Mara, svo einhver séu nefnd. Þá hefur hún birst á fjölda forsíða helstu tískutímarita heims.
Turlington lék í tónlistarmyndbandi hljómsveitarinnar Duran Duran við lagið Notorious og sat fyrir á plötuumslagi hljómsveitarinnar árið 1986, þá aðeins 17 ára. Þá kom hún einnig fram í tónlistarmyndbandi söngvarans George Michael fyrir lagið Freedom! '90. Innblásturinn fyrir myndbandið fékk Michael frá forsíðumynd tímaritsins breska Vogue, í janúar 1990, af Turlington, Tatjönu Patitz, Naomi Campbell, Cindy Crawford og Lindu Evangelistu. Myndin var tekin af hinum fræga ljósmyndara Peter Lindbergh.
Í áðurnefndu forsíðuviðtali tímaritsins Harper's Bazaar prýddi Turlington forsíðuna í 14. skipti á ferlinum, þá orðin 55 ára og í frábæru formi. Í viðtalinu við Turlington kom m.a. fram að þegar ofurfyrirsæturnar fimm komu fram í tónlistarmyndbandi George Michael við lagið Fredoom! '90 hafi orðið ákveðinn skurðpunktur þar sem hátíska færðist nær poppkúltúrnum.
Það voru svo Donatella og Gianni Versace sem tóku vinsældir tónlistarmyndbandsins enn lengra þegar þau fengu Turlington, Campbell, Crawford og Evangelistu til að ganga pallinn saman við Freedom! '90 á sýningu haustlínu Versace 1991, á meðan þær sungu með.
Fjölhæf og vel þenkjandi
Árið 2010 stofnaði Turlington óhagnaðardrifin samtök, Every Mother Counts, í þeim tilgangi að gera þunganir og barnsfæðingar óhultar fyrir konur um víða veröld. Samtökin hafa stutt við bakið á yfir 1,5 milljónum kvenna, fjölskyldna og heilbrigðisstarfsmanna og fjárfest yfir 42 milljónum dala til vitundarvakningar í þróunarsamfélögum.
Í desember 2011 birtist viðtal við Turlington í tímariti Forbes í tilefni af útgáfu hennar á heimildamyndinni No Woman, No Cry, sem fjallar um stöðu á heilsu mæðra í fjórum löndum. Myndin var heimsfrumsýnd á Tribeca-kvikmyndahátíðinni 2010.
Þegar Turlington var spurð í viðtalinu af hverju heilsa mæðra væri henni svo ofarlega í huga svaraði Turlington: „Ég lifði af og þraukaði í gegnum fylgikvilla eftir fæðingu fyrsta barnsins míns fyrir átta árum. Á þeim tíma sem ég gekk í gegnum þetta komst ég að því að þessi sami fylgikvilli væri algengasta orsök mæðradauða á heimsvísu ...“
Turlington hefur tekið þátt í fjölda annarra verkefna og samstarfi eins og við húðvörulínuna Sundari. Þá hefur hún einnig hannað tvær fatalínur fyrir vörumerkið Puma. Turlington hefur einnig skrifað í blöð á borð við Marie Claire, Teen Vogue og Yoga Journal, en sjálf hefur hún iðkað jóga síðan 1987. Hún hefur einnig skrifað fyrir Huffington Post.
Í tilefni af 40 ára afmæli Turlington tók tímaritið W saman safn af eftirtektarverðum myndum frá ferli hennar, myndum af tískupöllunum á níunda áratugnum og fram á 21. öldina, en hún sneri aftur í bransann þrátt fyrir að hafa gert hlé á fyrirsætustörfum þegar hún hóf nám 27 ára. Bransinn hefur þurft á henni að halda, enda sagði umboðsmaðurinn James Scully, sem fann fyrirsætur í verkefni m.a. fyrir Tom Ford, Carolinu Herrera, Ninu Ricci og Stellu McCartney, Turlington vera flottustu fyrirsætu allra tíma.
Fagnar upprunanum og neitar að biðjast afsökunar
Flensutilfellum fer fjölgandi
Kajakræðari hífður um borð í þyrlu
Guðrún: Erfið ákvörðun
Tiltekinni óvissu nú verið eytt
„Nei, við áttum sko alls ekki von á þessu“
Guðrún skaut fast á ríkisstjórnina
Íkveikja: Ekki skýrt að kveikjarar væru bannaðir