Hollywood syrgir Keaton
Setja bókamerki
Fjölmargir þekktir leikarar vestanhafs hafa síðustu daga minnst leikkonunnar Diane Keaton, sem lést á laugardag, 79 ára að aldri.
Ekki hefur verið greint frá dánarorsök Óskarsverðlaunaleikkonunnar, en í upptöku frá neyðarlínunni, sem slúðurvefsíðan TMZ hefur undir höndum, má heyra mann segja: „Person down.“
Símtalið barst frá heimili Keaton í Kaliforníu á laugardagsmorgun.
Keaton lék í fjölda kvikmynda á 60 ára ferli sínum, meðal annars Manhattan, First Wives Club, Something’s Gotta Give, þríleiknum um Guðföðurinn, Father of the Bride, Father of the Bride Part II, Reds og Baby Boom.
Hún hlaut Óskarsverðlaun árið 1977 fyrir leik sinn í kvikmyndinni Annie Hall, sem er lauslega byggð á Keaton sjálfri og fjölskyldu hennar, en Keaton heitir einmitt réttu nafni Diane Hall.
Stjörnur minnast Keaton
Margir hafa tjáð sig um fráfall leikkonunnar og minnst hennar á samfélagsmiðlum.
Leikkonurnar Goldie Hawn, Bette Midler og Sarah Jessica Parker, sem léku allar á móti Keaton í gamanmyndinni First Wives Club frá árinu 1996, birtu færslur á Instagram skömmu eftir að greint var frá andláti hennar.
„Það var, og verður, engin eins og þú“
„Diane, við erum ekki tilbúnar að missa þig. Þú hefur skilið eftir þig slóð af álfaryki, ljósglampa og minningum sem eru ofar öllum ímyndunum. Hvernig kveðjum við? Hvaða orð ná utan um sorgina þegar hjartað er brostið? Þér líkaði aldrei hrós, svo auðmjúk, en nú geturðu ekki sagt mér að halda kjafti, elskan. Það var, og verður, engin eins og þú,“ skrifaði Hawn meðal annars við fallega svarthvíta mynd af leikkonunni.
Midler skrifaði:
„Hin stórkostlega, fallega og einstaka Diane Keaton er látin. Ég get ekki lýst því hversu óbærilega sorgmædd ég er. Hún var bráðfyndin, algjörlega frumleg og laus við alla falskunnáttu eða samkeppnishegðun sem maður hefði búist við frá slíkri stjörnu. Það sem þú sást var það sem hún var … ó, la, lala!“
„Diane Keaton hefur verið ótal leikkonum innblástur. Ég tel mig meðal þeirra sem elskuðu og dáðu hana. Ég var svo lánsöm að fá að verða vitni að einstökum hæfileikum hennar og færni í bæði First Wives Club og The Family Stone. Ég mun ávallt geyma minningarnar í huga mínum frá tökustað sem og hrífandi, yndislegan og einstakan kvikmyndaferil hennar, sem er glæsileg arfleifð stórkostlegrar manneskju.
Hennar verður sárt saknað.
Hvíl í friði og guð gefi þér góða ferð, dásamlega vera.
X, SJ,“ skrifaði Parker.
Meðal annarra sem hafa minnst Keaton eru Jane Fonda, Mandy Moore, Francis Ford Coppola, Al Pacino, Kimberly Williams-Paisley, Octavia Spencer, Viola Davis, Reese Witherspoon, Andy Garcia, Michael Douglas og Kate Hudson, svo aðeins nokkrir séu nefndir.
Fjöldi aðdáenda hefur einnig deilt færslum á hinum ýmsu samfélagsmiðlum og lýst djúpri sorg yfir fráfalli einnar ástsælustu leikkonu Hollywood.
„Nei, við áttum sko alls ekki von á þessu“
Tiltekinni óvissu nú verið eytt
Íkveikja: Ekki skýrt að kveikjarar væru bannaðir
Heyrði ekkert í nýjum heilbrigðisráðherra
/frimg/1/60/99/1609948.jpg)
Furðar sig á slæmri umgengni
„Brotamenn hlæja að nálgunarbönnum“
Toppurinn nánast stráheill