Heidi Klum: Verður bara flottari eftir því sem hún eldist
Guðrún Sigríður Sæmundsen
Setja bókamerki
Þýska ofurfyrirsætan og viðskiptakonan Heidi Klum getur örugglega fengið ýmislegt annað til að rísa en hárin á handleggjunum. Hún var fyrsta þýska fyrirsætan til að verða einn af englum undirfatakeðjunnar Victoria's Secret, sem þótti ansi flott á tíunda áratugnum.
Árið 2022 birtist grein í tímaritinu Marie Claire sem sagði að breski söngvarinn, höfundurinn og plötuframleiðandinn Seal Henry Olusegun Olumide Adeola Samuel, eða einfaldlega Seal, hefði opnað sig í viðtölum eftir skilnaðinn við ofurfyrirsætuna.
Hann kom m.a. fram í spjallþætti Ellen DeGeneres 2012, með giftingarhringinn, og þegar hann var spurður út í ástæðu þess að hann bæri enn hringinn sagði hann það undirstrika hvað honum fyndist um Klum.
Eftir árangursríkan feril sem fyrirsæta tók hún að sér að vera þáttastjórnandi Germany's Next Topmodel og raunveruleikaþáttarins Project Runway og hlaut hún Emmy-verðlaun 2008 fyrir vikið. Hún var einnig verðlaunuð árið 2013 fyrir framúrskarandi frammistöðu sem þáttastjórnandi raunveruleikaþáttar.
Dökkhærða ljóskan
Klum er fædd 1. júní 1973 í Bergisch Gladbach, sem er nálægt Köln í Þýskalandi. Móðir hennar, Erna Klum, var hárgreiðslukona og faðir hennar, Günther Klum, var stjórnandi í snyrtivörufyrirtæki.
Ferill Klum byrjaði í módelkeppninni Model 92. Af 25.000 keppendum sigraði hún keppnina í apríl 1992. Í kjölfarið bauðst henni módelsamningur við umboðsskrifstofuna Metropolitan Models í New York, samningur sem hljóðaði upp á 300.000 dali.
Klum er ekki náttúrulega ljóshærð. Hún er nær óþekkjanleg á myndum frá því hún var unglingur, með mottu af brúnu, liðuðu hári og síðan topp. „Ég er ekki skilgreind út frá hárinu en ég held vissulega að fólk þekki mig sem og tengi mig við að vera ljóshærð,“ sagði hún í viðtali við tímaritið Harper's Bazaar 3. mars 2020.
Ofurfyrirsætan varð hvað þekktust fyrir að sitja fyrir á baðfötum fyrir sundfatamerkið Sports Illustrated og einnig fyrir að vera einn af áðurnefndum englum undirfatakeðjunnar Victoria's Secret.
Ástin entist ekki að eilífu
Árið 2004 hitti Klum breska tónlistarmanninn Seal. Þau giftu sig árið 2005 í einkaathöfn í Nýju-Mexíkó. Þau eignuðust þrjú börn saman: soninn Henry, í september 2005, soninn Jonah árið á eftir og dótturina Lou árið 2009.
Klum átti fyrir dótturina Leni Klum sem hún eignaðist með stjórnanda Formúlu 1-teymis Renault, Flavio Briatore, en þau hættu saman áður en Leni kom í heiminn. Hún var einmitt ólétt að Leni þegar hún fór að vera með Seal.
Í viðtali við Sunday Times sagðist Klum halda að þau Seal hefðu gift sig alls átta sinnum, en þau voru stöðugt að endurnýja heitin í von um að halda neistanum, sem gekk greinilega ekki upp.
Árið 2012 kom að því óumflýjanlega; Klum sótti um skilnað og skildi heiminn eftir agndofa – eða réttara sagt þá sem fylgst höfðu með stjörnuparinu í fjölmiðlum. Tveimur árum síðar var skilnaðurinn genginn í gegn. Ástæða skilnaðarins hefur aldrei komið almennilega í ljós, fyrir utan að þau sögðust einfaldlega hafa vaxið í sundur og hafa þau haldið vináttunni í gegnum sameiginlegt uppeldi barnanna. Hins vegar voru uppi getgátur um að Seal ætti „erfitt með að stjórna skapi sínu“.
Í maí 2018 fóru að birtast myndir á Instagram af Klum og gítarleikara þýsku popp- og rokksveitarinnar Tokio Hotel, Tom Kaulitz, á svipuðum tíma og þau mættu saman á rauða dregilinn á kvikmyndahátíðinni í Cannes. Klum og Kaulitz giftu sig í febrúar 2019 og eru enn saman enn þann dag í dag.
Gagnrýnd innan bransans
Hin heimsfræga Klum hefur ekki látið barneignir eða uppeldi aftra sér í að halda nafninu lifandi innan tísku- og fjölmiðlaheimsins. Hún hefur alltaf verið stórglæsileg og virðist bara verða flottari eftir því sem hún eldist.
Klum, sem er hvað þekktust fyrir kroppamyndir, hefur viðurkennt að hún elski að fækka fötum og að sjálf hafi hún alist upp í kringum fólk sem var mikið fyrir að sýna nekt. Hún hefur prýtt forsíður franska, þýska, portúgalska og spænska Vogue, ásamt tímaritunum Elle, InStyle, Marie Claire, Glamour og Harper's Bazaar. Hún hefur í gegnum tíðina verið minna „Chanel og Dior“ líkt og stöllur hennar og unnið meira með aðgengilegri vörumerkjum á borð við Bobbi Brown, H&m o.s.frv., sem hefur ekki gert hana síður vinsæla. Þá hefur hún einnig komið fram í sjónvarpsauglýsingum fyrir McDonald's.
Ofurfyrirsætan sat einnig fyrir í fjölda verka árin 1997-2010 á vegum förðunarfræðingsins og líkamsmálarans Joanne Gair.
Einhverjar eðlur í bransanum sögðu tískupallana ekki vera fyrir Klum. Árið 2009 voru Karl Lagerfield og þýski hönnuðurinn Wolfgang Joop sammála um að hún væri of þung og brjóstgóð til að ganga tískupallana ... Það er vandlifað!
Verður bara flottari
Árið 2010 yfirgaf Klum Victoria's Secret, sama ár og hún hóf samstarf við snyrtivörumerkið Astor, og 2011 var hún í öðru sæti á lista Forbes yfir tekjuhæstu fyrirsætur heims 2010-2011, með áætlaðar tekjur upp á 20 milljónir dala.
Eftir að hún fór frá englunum var sagt að hún hefði hallast meira í áttina að verða viðskiptakona.
Klum hannaði fatalínu fyrir þýska katalóginn Otto. Hún hannaði einnig skó fyrir Birkenstock, skartgripi fyrir Mouawad, fatalínu fyrir Jordache og auðvitað baðföt, fyrir Sports Illustrated. Klum á tvö ilmvötn: Heidi Klum og Me. Hún tók þátt í að hanna förðunarvörur fyrir Victoria's Secret. Þá hefur hún einnig hannað tvær línur fyrir meðgöngufatnað, svo fátt eitt sé nefnt.
Í júní 2024 birtist grein í tímaritinu Marie Claire yfir táknrænustu fyrirsætur heims og vitaskuld var Klum á þeim lista. Hún er enn að og er hægt að fylgjast með ævintýrunum á Instagram-síðunni hennar.
Til dagsins í dag hefur Klum haldið áfram að sitja fyrir á bað- og undirfötum, jafnvel ásamt Leni dóttur sinni fyrir ítalska merkið Intimissimi, eitthvað sem hún var úthrópuð fyrir árið 2024 líkt og fram kom í Daily Mail. Hún lét það ekki á sig fá og sat fyrir, ásamt dóttur sinni, á nýjum myndum á þessu ári.
Það eina sem hægt er að segja er: Áfram Heidi!
Toppurinn nánast stráheill
Óttast um atvinnuréttindi sín
Athugun á meðferðarheimilum: „Risastórt verkefni“
Greiðslan hafi ekki verið vanefnd
Treystir Karli Inga þrátt fyrir handtöku
„Setja allan fyrirvara heimsins“
Reiknar með fundi í næstu viku