Sex í sveit

Hjónakornin Benedikt og Þórunn skella sér í bústaðinn í Eyjafirði en hvort með sitt leyndarmálið í farteskinu. Hann hugsar sér gott til glóðarinnar þegar hún hyggur á heimsókn til móður sinnar og býður bæði viðhaldinu og vini sínum til veislu en allt í einu snýst eiginkonunni hugur og ákveður án fyrirvara að vera um kyrrt. Þá hitnar hratt í kolunum og þegar veisluþjónustan bætist í hópinn ætlar beinlínis allt um koll að keyra. Hver bauð hverjum í mat og til hvers? Hver er að halda við hvern og af hverju? Og hvað er veisluþjónustan að bjóða upp á í raun og veru?

Þessi sprenghlægilegi og vinsæli gamanleikur hefur farið algjöra sigurför um heiminn og lagt London, París, New York og Reykjavík að fótum sér. Gísli Rúnar og Bergur Þór hafa uppfært og tímastillt verkið upp á nýtt til að kitla hláturtaugarnar enn meira.

Sex í sveit eftir Marc Camoletti hefur farið sigurför um heiminn en verkið var síðast sett upp í Borgarleikhúsinu 1998. Gísli Rúnar Jónsson íslenskaði og leikstjóri sýningarinnar er Bergur Þór Ingólfsson.

Leikarar í sýningunni eru Haraldur Ari Stefánsson, Jörundur Ragnarsson, Katrín Halldóra Sigurðardóttir, Sigurður Þór Óskarsson, Sólveig Guðmundsdóttir og Vala Kristín Eiríksdóttir.

Listrænir stjórnendur eru Petr Hloušek, leikmyndahönnuður, Stefanía Adolfsdóttir, búningahönnuður, Guðbjörg Ívarsdóttir, leikgervahönnuður, Þórður Orri Pétursson, ljósahönnuður og Þorbjörn Steingrímsson, hljóðhönnuður.