Hundurinn hringdi í 112

Starfsmanni Neyðarlínunnar brá heldur í brún þegar hann tók á móti símtali seint á miðvikudagskvöld. Þegar svarað var í símann heyrðist þungur andardráttur og skringilegar stunur, og hélt starfsmaðurinn, ýmsu vanur, að hér væri símadóni á ferð.

Starfsmaðurinn gafst ekki upp við að reyna að ná sambandi við viðmælandann, og heyrði loks mannsrödd á hinni línunni sem sagði: "Svona kallinn, hvað ertu að gera?" og fleira í þá veru. Í ljós kom að hundur hafði gert sér lítið fyrir, tekið þráðlausan síma traustataki og hringt í neyðarnúmerið 112.

Eigandi hundsins, eldri maður, var að vonum ánægður með klókindi seppa, enda gott að vita að besti vinur mannsins geti hringt eftir hjálp ef eitthvað kemur fyrir.