Fæddi fjóra hvíta ljónsunga

Fjórir hvítir ljónsungar fæddust í Krone-sirkusnum í Þýskalandi. Ungarnir eru við hesta, já eða ljónaheilsu, og nærast vel samkvæmt því sem kemur fram í frétt á vef BBC.

Ungarnir eru ekki albínóar, heldur hvítir ljónsungar. Móðir þeirra, Princess,, og faðirinn King Tonga, bera bæði gen sem valda því að feldur ljóna verður hvítur.

Nátturuverndarsinnar í Suður-Afríku hafa undanfarið lagt áherslu á að færa hvít ljón aftur út í náttúruna. Einu náttúrulegu heimkynni hvítra ljóna eru á Timbavati-svæðinu í Suður-Afríku. Mörg hundruð hvít ljón eru í dýragörðum víðs vegar um heim, en einu frjálsu hvítu ljónin ráfa um áðurnefnd svæði í Suður-Afríku.

Talsmaður sirkussins sagði við fréttastofu BBC að ljónin yrðu ekki sýnd í sirkusnum í að minnsta kosti fjögur ár. Fyrst þyrftu þau að kynnast öðrum ljónum og fá rétta þjálfun.

Ungarnir munu fá nöfn eftir fjórar til fimm vikur, því ljónatemjarinn sem á að annast þjálfun þeirra vill fá að sjá hvers konar ljón býr innra með þeim áður en þeir verða nefndir.