„Hildur er frábær fyrirmynd og góð áminning um að allt getur gerst ef við leggjum okkur fram,“ segir Lilja Alfreðsdóttir mennta- og menningarmálaráðherra um sigur Hildar Guðnadóttur tónskálds. 

Hildur hlaut Óskarsverðlaunin í nótt fyrir tónlist sína í Jókernum en áður hefur hún hlotið fjölda verðlauna fyrir þá tónlist og fyrir tónlist sína í þáttaröðinni Chernobyl. 

Frétt af mbl.is

„Nær að hitta fólk alveg í hjartastað“

Lilja segir við tilefnið að innan mennta- og menningarmálaráðuneytisins séu í ferli metnaðarfull áform um að bæta í stuðning við menningu hérlendis. 

„Þetta sýnir að við erum að gera góða hluti og ég þakka fyrir þá góðu tónlistarmenntun sem eru í landinu. Ég ítreka, sem mennta- og menningarmálaráðherra, að við viljum bæta enn við í menninguna og erum með metnaðarfull áform innan ráðuneytisins um að styðja enn frekar við málaflokkinn.“

Frétt af mbl.is

Ríkisstjórnin sendi Hildi hamingjuóskir

Lilja segir sigurgöngu Hildar magnaða. „Árangur Hildar Guðnadóttur er stórkostlegur og ég óska henni og fjölskyldu hennar innilega til hamingju. Þetta er gríðarleg viðurkenning og henni tókst í nótt að skrifa mikilvægan hluta af íslenskri menningarsögu.“