Siglufjörður er fallegur bær á Norðvesturlandi. Bærinn er vinsæll áfangastaður ferðamanna og þá sérstaklega á sumrin. Síldarminjasafnið á Siglufirði er án efa perla bæjarins en þar má fræðast um hið margrómaða síldarævintýri á Siglufirði. 

Miðbærinn á Siglufirði er einstaklega fallegur og hefur verið gerður fallega upp á síðustu árum. Sigló Hótel stendur við smábátahöfnina og setur svip á bæinn.  

Siglufjörður er í um fimm klukkustunda akstursfjarlægð frá höfuðborgarsvæðinu.

Að gera

Gönguferð um Siglunes

Siglunes er nyrsta táin á milli Siglufjarðar og Héðinsfjarðar. Egill Helgason fór vel yfir sögu Sigluness í þáttum sínum um Siglufjörð sem voru á dagskrá RÚV hér fyrr í vetur. Á Siglunesi stóð bærinn Siglunes en hann hefur verið í eyði frá 1988.

Ganga upp í Hvanneyrarskál

Hvanneyrarskál skilur að Hvanneyrarhnjúk í norðri og Hafnarhyrnu í suðri en botn skálarinnar er í um 200 metra hæð. Gangan er sex kílómetra löng og í meðallagi erfið. Úr skálinni er frábært útsýni yfir fjörðinn og bæinn.

Margar gönguleiðir eru um Siglufjörð og á Tröllaskaga. Hægt er að nálgast kort af gönguleiðum á Bókasafni Fjallabyggðar á Gránugötu 24 á Siglufirði auk þess sem rafræn kort er að finna í Wapp. 

Að skoða

Síldarminjasafn Íslands

Síldarminjasafnið á Siglufirði er án efa eitt helsta aðdráttaraflið á Siglufirði. Safnið er eitt það stærsta á Íslandi og í þremur húsum. Það er vel þess virði að taka sér góðan tíma til að skoða það og fræðast um síldarárin á Siglufirði. 

Síldarminjasafnið á Siglufirði á góðum sumardegi. mbl.is/Sigurður Ægisson

Þjóðlagasetrið 

Þjóðlagasetrið á Siglufirði er til húsa í einu elsta húsi Siglufjarðar. Í því eru  íslensk þjóðlög kynnt á aðgengilegan og skemmtilegan hátt. Þar er boðið upp á myndbönd af fólki á öllum aldri sem syngur, kveður eða leikur á hljóðfæri. Sagt er frá þjóðlagasöfnun séra Bjarna Þorsteinssonar (1861-1938), greint frá heimildarmönnum hans og mörgum þeim sem aðstoðuðu hann við söfnunina víða um land.

Sumarkvöld á Siglufirði. Ljósmynd/Þjóðlagasetrið

Matur & drykkur

Fríða súkkulaðikaffihús

Súkkulaðikaffihús Fríðu er hið fullkomna falda kaffihús. Þar er hægt að gæða sér á dýrindis góðum kaffidrykkjum og fá sér handgert súkkulaði frá Fríðu með.

Hótel Siglunes

Á Hótel Siglunesi er að finna einn besta veitingastað norðan heiða. Marokkóski kokkurinn Jaouad Hbib töfrar þar fram marokkóskan mat úr íslensku hráefni. Hægt er að fylgjast með matseðlinum á facebooksíðu veitingastaðarins. 

Segull 67

Segull 67 er lítið brugghús á Siglufirði. Hægt er að bóka skoðunarferð um brugghúsið inni á vef þeirra www.segull67.is.

Segull 67. Ljósmynd/Facebook

Gisting

Sigló Hótel

Sigló Hótel stendur við höfnina í Siglufirði. Hótelið opnaði dyr sínar árið 2015 og hefur síðan verið vinsæll áfangastaður ferðamanna.

Sigló Hótel nýtur sín mjög vel við smábátahöfnina á Siglufirði og setur svip sinn á umhverfið. mbl.is//Sigurður Ægisson

The Herring House

The Herring House er lítið og fallegt gistihús í Siglufirði. Húsið stendur rétt hjá kirkjunni og tekur aðeins tvær mínútur að ganga niður í miðbæinn.

The Herring House. Ljósmynd/Facebook