Fyrrverandi knattspyrnumaðurinn Rúrik Gíslason prýðir forsíðu fylgitímarits Playboy í Þýskalandi. Í fylgitímaritinu Essentials er lögð áhersla á tísku og er Rúrik í viðtali auk þess sem hann situr fyrir á myndum. 

Rúrik er ekki síður þekktur fyrir flotta framkomu en frammistöðu á vellinum. Í ritstjórnarpistli Essentials er til að mynda rifjað upp hvernig Rúrik heillaði konur víða um heim á heimsmeistaramótinu í knattspyrnu 2018. Í viðtalinu ræðir Rúrik um tísku og ferilinn eftir að hann lagði skóna á hilluna. 

Frétt af mbl.is

Rúrik skráir sig í sögubækur Let's Dance

Rúrik sinnir nú fyrirsætustörfum, gefur út tónlist og síðast en ekki síst er hann orðinn súperstjarna í Þýskalandi eftir frammistöðu sína í þættinum Let's Dance í Þýskalandi.

Myndirnar af Rúrik eru ekki sérstaklega svæsnar miðað við forsíðu Playboy en hana prýðir Hayley Hasselhoff, dóttir Davids Hasselhoffs. Dansfélagi Rúriks í þættinum Let's Dance í Þýskalandi sat fyrir í þýska Playboy í síðasta mánuði. Renata var töluvert fáklæddari en Rúrik.