„Þeir hafa leikið sér að trú Protasevich. Hann hefur verið neyddur til þess að lofa stjórnarhætti Lúkasjenkós opinberlega. Við vitum hins vegar hvernig slík játning er fengin fram,“ segir Svetlana Ts­íkanovskaja, leiðtogi stjórn­ar­and­stöðunn­ar í Hvíta-Rússlandi, í samtali við mbl.is, en hún er hér á landi í boði utanríkisráðherra. 

Frétt af mbl.is

Vel fór á með Svetlönu og Guðlaugi

Ts­íkanovskaja segir að blaðamaðurinn Roman Protasevich hafi fyrir víst verið pyntaður og honum ógnað með öryggi kærustu hans og fjölskyldu. Prota­sevich og kærasta hans, Sofia Sapega, voru hand­tek­in í Minsk í maí eft­ir að farþegaþot­unni sem þau voru farþegar í var gert að lenda þar á leið frá Aþenu til Vilnius. 

Sofia Sapega og Roman Protasevich. AFP

„Við kennum Roman hins vegar alls ekki um ummæli sín þar sem við skiljum hvað hann hefur þurft að ganga í gegnum. Hlutverk hans núna er einungis að lifa af, sem getur verið mjög erfitt í fangelsum Hvíta-Rússlands. Yfirvöld þar vilja að við kennum honum um ummæli hans og að stjórnarandstaðan líti á hann sem svikara en það er ekki raunveruleikinn.“

Frétt af mbl.is

Protasevich og Sapega færð í stofufangelsi

Protasevich hefur verið færður í stofufangelsi og segir Tsíkanovskaja að eftirlit með honum sé strangt. „Hann býr alls ekki við frelsi og er haldið sem gísli undir öðrum kringumstæðum en í fangelsi.“

Tsíkanovskaja segist ekki vita hvað yfirvöld í Hvíta-Rússlandi séu að láta Protasevich gera nú en hann hefur ekki birst opinberlega í nokkrar vikur.