Jarðskjálftavirkni á Reykjanesskaga er að færast í eðlilegt horf, að mati Páls Einarssonar jarðeðlisfræðings. Undanfarið hafa flekaskilin sem liggja eftir skaganum endilöngum teiknast greinilega upp á jarðskjálftakortum.

„Venjulega eru smáskjálftar víða á Reykjanesskaga. Það er áberandi gat í skjálftavirkninni sem tengist Brennisteinsfjöllum og Bláfjöllum. Því fylgir opin viðvörun um stóran skjálfta en það er orðið nokkuð langt síðan þar losnaði síðast um spennu á flekaskilunum,“ sagði Páll.

Þorvaldur Þórðarson, prófessor í eldfjallafræði við HÍ, segir að fyrir síðustu helgi hafi víða sést í glóð í hrauninu og afgösun verið í gígnum og víðar. Ýmislegt bendir til að einhver kvika komi enn upp.