Þór­hild­ur Sunna Ævars­dótt­ir, þingmaður Pírata, sagði Katrínu Jakobsdóttur forsætisráðherra grafa undan sjálfstæði Persónuverndar með bréfi sem hún sendi Kára Stefánssyni, forstjóra íslenskrar erfðagreiningar, fyrr í mánuðinum.

Þórhildur spurði Katrínu út í bréfið á Alþingi í dag í óundirbúnum fyrirspurnatíma en bréfið snýr að úrskurði Persónuverndar um að Íslensk erfðagreining hafi brotið lög.

Frétt af mbl.is

„Hvaða hagsmuni er verið að verja með þessu?“

Málið snýr í meg­in­drátt­um að því að sótt­varna­lækn­ir tók þá ákvörðun í sam­ráði við Íslenska erfðagrein­ingu að kanna hversu stór hundraðshluti lands­manna hefði myndað mót­efni við veirunni. Skoðað var þá mót­efni í blóði þeirra sem höfðu smit­ast og sýkst al­var­lega og því voru tek­in sýni úr ein­stak­ling­um sem lágu sýkt­ir inni á Land­spít­ala.

Úrskurðurinn kom Katrínu verulega á óvart

Á föstudag birtist grein á Vísi eftir Kára þar sem hann birti afrit af bréfi frá Katrínu þar sem hún segir úrskurð Persónuverndar hafi komið henni verulega á óvart.

Þá segist Katrín í bréfinu vera „sammála því mati sóttvarnalæknis að umrædd rannsókn og vinnsla persónuupplýsinga (blóðsýnatakan) hafi verið hluti af opinberum sóttvarnaráðstöfunum, enda var hún unnin að beiðni sóttvarnalæknis og með Landspítalanum.“

„Ómetanlegt“ framlag

Þórhildur sagði á Alþingi í dag að í úrskurði Persónuverndar hafi komið fram að blóðsýnatakan sé hvergi að finna í skrám Landspítalans og hún hafi þar af leiðandi ekki verið unnin með spítalanum.

Þórhildur sagði því að með bréfinu grafi Katrín undan sjálfstæði Persónuverndar.

Frétt af mbl.is

Ekki vísindasiðanefndar að dæma í máli Kára

„Ég velti fyrir mér hver tilgangurinn var með þessu bréfi og hvers vegna forsætisráðherra ákveður að tjá sig um afstöðu sína gagnvart úrskurði sjálfstæðrar stofnunar gagnvart forstjóra fyrirtækisins sem úrskurðurinn fjallaði um,“ sagði Þórhildur.

Í svari Katrínar sagði hún að það væri hennar skilningur að Landspítalinn hafi verið þátttakandi rannsókn Íslenskrar erfðagreiningar og að hún byggi sínar upplýsingar annars vegar á samtölum við sóttvarnalækni og hinsvegar á upplýsingum frá heilbrigðisráðuneytisins.

Þá undirstrikaði Katrín að framlag Íslenskrar erfðagreiningar væri „ómetanlegt“ í baráttu við heimsfaraldurinn.