Jón Gunnarsson dómsmálaráðherra ætlar að funda með forstjóra Landhelgisgæslunnar vegna nýlegrar skýrslu Ríkisendurskoðunar þar sem olíukaup Gæslunnar í Færeyjum voru meðal annars gagnrýnd.

Frétt af mbl.is

Olíukaup Gæslunnar í Færeyjum gagnrýnd

Í skýrslunni segir meðal annars: „Þeir aðilar sem þiggja rekstr­ar­fé sitt úr rík­is­sjóði geta ekki vísað til þess að með því að kom­ast hjá greiðslu op­in­berra gjalda sé stuðlað að rekstr­ar­hag­kvæmni. Sigl­ing­ar Land­helg­is­gæsl­unn­ar í þess­um til­gangi fela í sér sóun, óþarfa meng­un og skerðingu á viðbragðsgetu varðskipa inn­an efna­hagslög­sög­unn­ar."

Jón Gunnarsson.

„Ég er sannfærður um það að við verðum sammála um að taka þessum ábendingum vel og þeirri gagnrýni sem við fáum til að gera sterka og góða stofnun enn betri,“ sagði Jón að loknum ríkisstjórnarfundi í morgun, spurður hvort hann ætlar að beita sér fyrir breytingum hvað varðar olíukaupin. „Þetta er ein af ábendingunum sem þar koma fram og ég vænti þess að við tökum fullt tillit til þess.“

Jón Gunnarsson tekur við lykunum af dómsmálaráðuneytinu úr höndum Áslaugar Örnu Sigurbjörnsdóttur. mbl.is/Eggert Jóhannesson

Vill strangar reglur um þyrluferðir

Þyrluferðir ráðherra eða annarra með flugvélum, þyrlum eða skipum Gæslunnar í einkaerindum voru einnig harðlega gagnrýndar í skýrslunni. „Sú gagnrýni er góð og ég ítreka mikilvægi þess að um þetta gilti settar og strangar reglur,“ sagði Jón, spurður út í gagnrýnina.

Frétt af mbl.is

Ferðir í einkaerindum „al­var­lega at­hug­un­ar­verðar“

„Það eru ákveðna reglur í gildi og við munum skoða hvort þær þurfi að fá einhvers konar yfirferð í tengslum við þessar athugasemdir Ríkisendurskoðunar,“ bætti hann við almennt um gagnrýnina sem kemur fram í skýrslunni.