Joe Biden Bandaríkjaforseti þvertekur fyrir að hafa dregið ummæli sín til baka, sem féllu í lok ræðu hans í Varsjá á laugardagskvöld, um að Vladimír Pútín Rússlandsforseti gæti ekki verið áfram við völd.
Joe Biden Bandaríkjaforseti þvertekur fyrir að hafa dregið ummæli sín til baka, sem féllu í lok ræðu hans í Varsjá á laugardagskvöld, um að Vladimír Pútín Rússlandsforseti gæti ekki verið áfram við völd.
Joe Biden Bandaríkjaforseti þvertekur fyrir að hafa dregið ummæli sín til baka, sem féllu í lok ræðu hans í Varsjá á laugardagskvöld, um að Vladimír Pútín Rússlandsforseti gæti ekki verið áfram við völd.
Þetta tjáði forsetinn blaðamönnum í Hvíta húsinu í dag.
„Ég er ekki að taka neitt til baka ... Ég vil gera það ljóst, að ég var ekki þá, og ekki heldur núna, að mæla fyrir einhverri stefnubreytingu. Ég var að láta í ljós þá siðferðislegu hneykslan sem ég finn fyrir – ég biðst engrar afsökunar á mínum eigin tilfinningum,“ sagði Biden við blaðamenn.
Þá kvaðst hann ekki hafa áhyggjur af því að ummælin gætu ýtt undir frekari spennu gagnvart Pútín vegna innrásarinnar í Úkraínu. Bætti Biden við að hann hefði verið að „tala til rússnesku þjóðarinnar, að segja henni hvað okkur finnst“.
„Mér er sama hvað honum finnst,“ sagði hann enn fremur um Pútín.
„Þetta er náungi sem fer eftir eigin takti, og sú hugdetta – að hann muni gera eitthvað yfirgengilegt vegna þess að ég kallaði hann það sem hann er, og sagði hvað hann er að gera – ég held að hún sé ekki rökrétt.“
„Í Guðs bænum, þessi maður getur ekki verið áfram við völd,“ hafði forsetinn sagt, um tveimur sólarhringum áður, fyrir utan konunglega kastalann í Varsjá.
Ummælin þóttu undir eins gefa til kynna mikla stefnubreytingu bandarískra stjórnvalda.
En þau fengu ekki að standa lengi. Eða öllu heldur merking þeirra. Embættismaður frá Hvíta húsinu var nefnilega fljótur að stíga fram eftir að ræðunni lauk. Fullyrti sá að forsetinn hefði ekki raunverulega átt við það að Pútín væri ekki lengur vært á valdastóli.
„Meining forsetans var sú að það mætti ekki leyfa Pútín að beita valdi sínu gagnvart nágrönnum sínum eða á svæðinu,“ höfðu fréttamiðlar eftir embættismanninum, en nafni hans var haldið leyndu. „Hann var ekki að tala um völd Pútíns í Rússlandi, eða stjórnarskipti.“
Nú virðist aftur á móti sem Biden gangist við þeirri merkingu sem ráða mátti af orðum hans.
Þau hafi þó fallið af vörum hans sjálfs, Joe Biden, en ekki af vörum 46. forseta Bandaríkjanna.