Talsverð skjálftavirkni hefur mælst á Reykjanesskaganum síðustu vikuna og hefur virknin verið hvað mest við Svartsengi og í nágrenni Grindavíkur. Alls hafa um 1.700 skjálftar mælst í sjálfvirka kerfinu á þessu svæði í vikunni, sá stærsti um 2.9 að stærð.

Þetta kemur fram á vef Veðurstofu Íslands. 

Þar segir einnig, að í frétt sem hafi verið birt í lok síðasta mánaðar hafi komð fram að GPS-mælanetið á Reykjanesskaganum, sem nemi færslur á yfirborði jarðar, sýni þenslumerki sem bendi  til kvikusöfnunnar á talsverður dýpi við Fagradalsfjall.

GPS-stöðvar í nágrenni við Þorbjörn hafi á síðustu tveimur vikum sýnt breytingar sem benda til lítilsháttar þenslu við Svartsengi.

„Þessar færslur sem við sjáum eru ennþá litlar, í kringum 10-15mm þar sem þær eru mestar“, er haft eftir Benedikt G. Ólafssyni, sérfræðingi á sviði jarðskorpuhreyfinga á Veðurstofu Íslands, en Benedikt í samvinnu við Jarðvísindastofnun Háskólans fylgist náið með jarðskorpuhreyfingum á svæðinu.

„Færslan sem við greinum nú svipar til þeim sem við greindum á sömu slóðum fyrri hluta árs 2020“, segir Benedikt jafnframt.

Þá segir, að InSAR gervitunglamyndir, sem spanni tímabilið 29. apríl - 7 maí og 21. apríl – 8. maí, sýni sambærilegar breytingar og mælst hafi á GPS stöðvunum.

„Það sem við höfum lært af eldsumbrotunum á Reykjanesskaga er að aukning í skjálftavirkni og aflögun getur verið fyrirvari eldgoss, en þá er það alls ekki alltaf raunin“, er haft eftir Michelle Maree Parks, en Michelle er ein af vísindamönnum í aflögunarteymi Veðurstofunnar, sem fylgist meðal annars með landrisi.

„Eins og oft áður þurfum við hreinlega að sjá hver þróunin verður. Við erum að keyra líkön til að meta t.d. á hvaða dýpi kvikan er á þessu tiltekna svæði. Eins eigum von á nýjum InSAR myndum síðar í mánuðinum og þær eru hluti af þeim gögnum sem við munum vinna úr til að átta okkur betur á þróuninni á svæðinu við Svartsengi”, segir Michelle ennfremur.