Nokkuð misjafnt var hvert eðli og áhrif fyrstu bylgju kórónuveirufaraldursins var á Norðurlöndunum þegar horft er til heilsufarslegra og efnahagslegra mælikvarða.

Frá mars 2020 fram á þriðja ársfjórðung 2021 jókst dánartíðni umtalsvert í Svíþjóð á meðan hún hækkaði smávægilega í Finnlandi og Danmörku en dróst hins vegar saman á Íslandi, að því er segir á vef Hagstofunnar.

Í Noregi var dánartíðni lægri árið 2020 miðað við 2019 og engin breyting varð á milli áranna 2020 og 2021. Uppsöfnuð dánartíðni vegna faraldursins var þó langhæst í Svíþjóð þegar öll Norðurlöndin eru borin saman.

Efnahagsleg áhrif kórónuveirufaraldursins voru greinileg á öllum Norðurlöndunum þar sem verg landsframleiðsla dróst saman um 6 til 8% á öðrum ársfjórðungi 2020 en hækkaði svo á þriðja ársfjórðungi.

Áhrif kórónuveirufaraldursins á útgjöld heimila komu sterklega fram á öðrum ársfjórðungi 2020 og voru áhrifin mest á Íslandi af Norðurlöndunum. Að auki voru útgjöld íslenskra heimila lengur að komast á svipað ról og var fyrir fyrstu bylgju faraldursins.

Frá upphafi kórónuveirufaraldursins hefur orðið samdráttur í fæðingum í flestum ríkjum heimsins. Leitni í fjölda fæðinga hefur hins vegar verið upp á við á Norðurlöndunum. Til dæmis hefur fæðingartíðni í Finnlandi farið stöðugt minnkandi frá árinu 2010 en það snerist við á meðan á fyrstu bylgju faraldursins stóð.