Síðastliðinn sólarhring fór slökkviliðið á höfuðborgarsvæðinu í 110 sjúkraflutninga, en undanfarna daga hefur verkefnum sem tengjast Covid-19 fjölgað. 

Guðjón Ingason slökkviliðsmaður segir í samtali við mbl.is að þótt Covid-sjúkraflutningar séu ekki orðnir jafn margir og áður verði slökkviliðsmenn varir við aukningu á hverjum degi.

Flytja fólk til og frá Birkiborg 

„Á tímabili var þetta úr sögunni, en nú eru fleiri og fleiri Covid-sýktir að óska eftir sjúkrabíl. Þetta er aðallega eldra fólk sem þarf að komast til og frá Birkiborg.“

Birkiborg hefur verið virkjuð á ný, en um er að ræða Covid-19-einingu utan bráðamóttökunnar, þar sem Covid-sýktir einstaklingar gangast undir læknisskoðun og metið er hvort þeir þurfi á innlögn að halda eða ekki. 

Frétt af mbl.is

Fjölgaði um sex síðastliðinn sólarhring

Ráða við ástandið

Slökkviliðið fylgist með þróuninni og bregst við ef þarf, með aukinni mönnun vakta. „Við ráðum við þetta í dag, en á sínum tíma var það breytilegt, við bæði fjölguðum og skárum niður mannskap,“ segir Guðjón.

Slökkviliðsmenn sem sinna Covid-tengdnum útköllum þurfa að klæða sig upp í svokallaðan sóttvarnagalla og bera andlitsgrímur. Guðjón viðurkennir að þeir hafi verið farnir að vonast til þess að þurfa ekki að grípa í þann búnað á ný, „en svona er þetta bara, við höldum okkar striki“.