Styrmir Bjartur Karlsson fasteignasali hefur gaman af því að keyra um Snæfellsnesið. Hótel Búðir er í uppáhaldi hjá honum þegar hann ferðast um Vesturland. 

„Uppáhaldsstaðurinn minn á Vesturlandi er Hótel Búðir á sumrin. Allt það umhverfi undir Snæfellsjökli er að mínu mati alveg einstakt og fullt af orku. Ég tek alltaf hringinn í kring á leið til baka og stoppa í kringum Kirkjufell og borða hádegismat á Stykkishólmi á Sjávarpakkhúsinu. Ef veðrið er gott tek ég Hvalfjörðinn heim. Ég lærði að meta hann þegar ég var ekki tilneyddur að keyra hann. Svo finnst mér gaman að taka Kjósina upp að Þingvallaafleggjaranum og Nesjavallaleið heim. Þetta er sú leið sem ég beini öllum erlendum gestum að fara þegar þeir eru á þessum slóðum,“ segir Styrmir.