„Þetta er kannski aðeins að róast en það er enn mikið streymi fólks að panta ferðir hjá okkur, þá bæði túristar og Íslendingar,“ segir Elísabet Emma Pálsdóttir, söluráðgjafi hjá Norðurflugi, í samtali við mbl.is um aðsókn í þyrluferðir yfir eldgosið í Meradölum um þessar mundir.

Síðastliðinn laugardag voru þrjár þyrlur á ferð yfir gosið og fóru þær um 8-11 ferðir hver, en það komast 5-6 farþegar í hverja þyrlu. 

„Auðvitað sækja Íslendingar meira í helgarnar. Það biðja líka margir um að fá að fljúga í myrkrinu en við megum bara fljúga í dagsbirtu. Annars er brjálað að gera frá 8-20 alla daga og við fljúgum svo lengi sem veður leyfir,“ segir Elísabet.

Ná betur utan um þetta núna

Elísabet segir fyrirtækið ná betur að halda utan um ferðirnar núna en í fyrra þegar gaus við Fagradalsfjall í Geldingadölum. 

„Við náðum að skipuleggja okkur miklu betur núna en ég finn fyrir svipuðum fjölda fólks. Annars lærðum við mikið í fyrra hvernig við eigum á að tækla þennan mikla fjölda pantana.“

Miðvikudaginn 10. ágúst síðastliðinn fór fyrsta þyrluferðin í loftið klukkan 9 og síðasta ferð kom til baka 22.30, en þá flugu alls 134 farþegar yfir gosstöðvarnar. „Þetta var mjög langur dagur,“ útskýrir Elísabet létt í bragði.

Mega aðeins fljúga í dagsbirtu

Norðurflug hefur aðeins heimild til að fljúga með farþega í dagsbirtu. Sólin mun setjast um hálfníuleytið í byrjun september og þá mun fyrirkomulagið breytast eitthvað.

„Allar vélar verða að vera lentar fyrir klukkan 23 núna. Við munum reyna að nýta hvern einasta klukkutíma í dagsbirtu og fljúga eins mikið og við getum,“ segir Elísabet að endingu.