Autt blað hefur orðið að tákni mótmælanna í Kína gegn ströngum sóttvarnareglum yfirvalda, sem brutust út í kjölfar eldsvoða í borginni Urumqi þar sem tíu manns fórust. Takmörkunum stjórnvalda vegna kórónuveirunnar hefur verið kennt um hve illa fór. BBC greinir frá.

Frétt af mbl.is

Slakað á takmörkunum vegna mótmæla

Milljónir Kínverja hafa búið við útgöngubann, takmarkanir á ferðafrelsi og þurft að gera grein fyrir heilsufari sínu í tæplega þrjú ár. Lítið hefur verið slakað á takmörkunum þrátt fyrir mjög fá smit í samfélaginu.

Íbúar landsins eru orðnir langþreyttir á ástandinu en steininn tók úr við eldsvoðann og brutust mótmæli út víða um Kína. Einhverjar tilslakanir hafa þó orðið eftir að mótmælin hófust.

AFP/Noel Celis

Ögra yfirvöldum

Mótmælendur sjást margir hverjir halda auðu hvítu blaði á lofti, en gjörningurinn á rætur sínar að rekja til mótmæla í Hong Kong árið 2020 þar sem nýjum ströngum lögum um þjóðaröryggi var mótmælt. Þá höfðu yfirvöld bannað slagorð og frasa sem notaðir höfðu verið í fjöldamótmælum.

Frétt af mbl.is

Mótmælendur handteknir í Sjanghæ

Autt blað er þó ekki aðeins talið vera tákn fyrir þöggunina heldur líka til að ögra yfirvöldum, því erfiðara er að handtaka fólk fyrir að segja ekki neitt.

Mótmælendur á götum í Peking hafa meðal annars sagt að blaðið tákni allt það sem þeir vilja segja en mega ekki. En líka vísun í takmarkanir sem Kínverjar búa við í tengslum við leitarvélar á netinu og samfélagsmiðla.