Heldur meira var að gera en venjulega í sundlaug Seltjarnarness í morgun, en hún var ein af fáu laugunum á höfuðborgarsvæðinu sem var opin í dag. 

Frétt af mbl.is

Loka sundlaugum vegna skorts á heitu vatni

„Fólk kemur aðallega úr Vesturbæjarlauginni hingað til okkar,“ segir Ingólfur Klausen, yfirvaktstjóri sundlaugarinnar í Seltjarnarnesi, í samtali við mbl.is. 

„Þeir eru með svona hlaupahópa og svona sem eru alltaf komnir af stað snemma á morgnanna, það er það eina sem við höfum tekið eftir í dag, það er heldur meira,“ segir Ingólfur en hann segir þann hóp sundlaugagesta sjálfa kalla sig flóttamenn vegna lokunnar Vesturbæjarlaugarinnar. 

Frétt af mbl.is

Kuldakaflanum lýkur í dag

Hitaveitan á Seltjarnarnesi breytir öllu

Seltjarnarnes er ein af fáu sundlaugunum á höfuðborgarsvæðinu sem er opin í dag en það er vegna þess að að Seltjarnarnes er með sína eigin hitaveitu.

„Það er það sem að breytir öllu. Það er alla vega ennþá nógur þrýstingur á okkur. Það var ansi kalt í morgun, 14 gráðu frost. Það munar því að það er ekki vindur, um leið og það hreyfir einhvern vind þá verður þetta allt erfiðara og þá kólnar allt niður,“ segir Ingólfur.

Vatnið í sundlauginni er beint frá borholu Hitaveitu Seltjarnarness. Ljósmynd/Sundlaug Seltjarnarness

Hann telur að það verði ekkert brjálað að gera í lauginni í dag og að fólk sé í sjálfu sér ekki að streyma í sund í frostinu,

„Ég á ekkert von á neitt mikilli aðsókn. Þetta var nú um daginn líka að það var lokað en það breytti ekki miklu. Kannski verður eitthvað meira í kvöld, það er engin stórbreyting. Það er bara góð stemmning og við erum svo heppin að við getum haldið öllu opnu,“ segir Ingólfur.

Frétt af mbl.is

Sundlaug Seltjarnarness opin í dag