Héraðsdómur Reykjavíkur hefur sakfellt karlmann á fertugsaldri fyrir kynferðisbrot. Hann játaði brot sitt skýlaust og var dæmdur í fjögurra mánaða skilorðsbundið fangelsi. 

Lögreglustjórinn á höfuðborgarsvæðinu ákærði manninn fyrir kynferðisbrot með því að hafa, um nokkurt skeið fram til föstudagsins 8. nóvember 2019 aflað sér og haft í vörslum sínum í farsíma og í fartölvu samtals 2.230 teiknaðar myndir og 42 teiknuð myndskeið sem sýna börn á kynferðislegan eða klámfenginn hátt, en lögreglan lagði hald á myndefnið við húsleit á heimili mannsins í Reykjavík. 

Sem fyrr segir, þá játaði maðurinn brot sín skýlaust og var því sannað með játningu hans og öðrum gögnum málsins að hann væri sekur um þá háttsemi sem honum var gefin að sök. 

Fram kemur í dómi héraðsdóms, sem féll 19. janúar en var birtur í gær, að samkvæmt sakavottorði mannsins var hann með dómi Héraðsdóms Reykjavíkur frá 2020 dæmdur í þriggja mánaða skilorðsbundið fangelsi fyrir blygðunarsemisbrot. Sakaferill hans hefur að öðru leyti ekki þýðingu við úrlausn málsins.

Alvarlegt brot

„Við ákvörðun refsingar er litið til greiðrar játningar ákærða sem horfir til mildunar. Til refsiþyngingar horfir að um er að ræða alvarlegt brot sem telst til kynferðisbrota. Þrátt fyrir að um sé að ræða teiknaðar myndir og myndskeið ber að líta til þess að markmið refsinga fyrir vörslu á efni af þessu tagi, sem sýnir börn á kynferðislegan og klámfenginn hátt, er að styrkja vernd barna gegn kynferðislegri misnotkun, m.a. í tengslum við gerð slíks efnis,“ segir í dómnum.

Þá segir, að við ákvörðun refsingar sé litið til þess að meðferð málsins hafi dregist óhóflega hjá ákæruvaldinu af ástæðum sem manninum verður ekki kennt um, en rannsókn stóð yfir með hléum frá október 2019 til janúar 2021 er seinni framburðarskýrsla ákærða var tekin. Ákæra var svo gefin út 8. nóvember 2022.

Tekið er fram að maðurinn kveðst hafa leitað sálfræðilegrar aðstoðar á sínum tíma og sé fús til frekari meðferðarvinnu.