Sam­tök­in Sam­hjálp fögnuðu 50 ára af­mæli sínu á þriðjudaginn var en stofndagur var 31. janú­ar 1973. Samhjálp var stofnuð á 50 ára af­mæl­is­degi Ein­ars J. Gísla­son­ar í Betel, sem lét all­ar af­mæl­is­gjaf­ir renna til Sam­hjálp­ar. Edda Jónsdóttir, barnabarn Einars heitins, er framkvæmdastjóri Samhjálpar í dag. Sam­tök­in halda úti meðferðar­heim­il­inu Hlaðgerðarkoti í Mos­fells­dal, nytja­markaði og kaffi­stofu fyr­ir þá sem á þurfa að halda og ráku á tíma­bili gisti­skýli fyr­ir heim­il­is­lausa.

Það var margt um manninn í afmælisveislunni. Edda bauð gesti velkomna og Eliza Reid forsetafrú hélt stutt erindi. Dagur B. Eggertsson borgarstjóri í Reykjavík lét sig ekki vanta en með honum í för var Þórir Kjartansson húsvörður Ráðhússins. Það var vel við hæfi að Þórir kæmi með í afmæli Samhjálpar því hann á samtökunum líf sitt að launa.

Fyrir tíu árum glímdi hann við fíknivanda, var heimilislaus og svaf í bílakjallara Ráðhússins. Með hjálp Samhjálpar náði hann að losa sig úr viðjum fíknarinnar og eignaðist gott líf með hjálp góðs fólks. Sagan hans hreyfði við fólki enda er hún kraftaverki líkust.