Athafnamaðurinn Fjölnir Þorgeirsson og unnusta hans, lögfræðingurinn Margrét Magnúsdóttir, hafa sett íbúð sína við Fellahvarf í Kópavogi á sölu. Íbúðin er staðsett í snyrtilegu fjölbýlishúsi sem reist var árið 2003 og er 119 fm að stærð. 

Íbúðin er björt með stórum gluggum sem veita stórkostlegt útsýni til fjalla og niður að Elliðavatni.

Stofa og borðstofa eru samliggjandi, en þar má sjá fallega húsmuni. Sjöan prýðir borðstofuna, en stólarnir eru klassísk hönnun úr smiðju Arne Jacobsen frá árinu 1955. Fallegar grænar plöntur eru víða í rýminu og skapa notalega stemningu. 

20 fm svalir með trylltu útsýni

Frá borðstofu er útgengt á 20 fm svalir til suðurs og suðvesturs.

Baðherbergið hlaut nýverið allsherjar yfirhalningu og óhætt að segja að útkoman sé glæsileg. Tvær gerðir af flísum voru notaðar sem skapa skemmtilegar andstæður og gefa rýminu mikla mýkt. 

Sjá á fasteignavef mbl.is: Fellahvarf 25