Varað var við töluverðri hættu á snjóflóðum á Austfjörðum, í innanverðum Eyjafirði og á utanverðum Tröllaskaga í gær. Veðrið er betra í dag og minni líkur á að snjóflóð falli af sjálfu sér en vísbendingar eru um að snjólögin séu veik um þessar mundir. Snjóflóðavakt Veðurstofu Íslands varar útivistarfólk að vera á ferð í brattlendi.

Frétt af mbl.is

Snjóflóð fallið og varað við frekari hættu

„Það er ekkert flóð að fara að falla af náttúrulegum orsökum núna og einungis fólk sem gæti sett af stað flóð núna. Það er gott veður í dag en það þyrfti að vera meiri vindur og úrkoma til þess að flóð færu að falla af sjálfu sér,“ seg­ir vaktahafandi sér­fræðing­ur á snjóflóðavakt Veður­stofu Íslands, í sam­tali við mbl.is og bætir við að mögulega gætu flóð þó fallið á Austfjörðum vegna veðurs í dag.

Beina tilmælum til útivistarfólks

Nokkur snjóflóð hafa fallið á Aust­fjörðum síðustu daga, þau stærstu í ná­grenni við Eskifjörð. Snjóflóðin eru ekki nálægt byggð og beinir snjóflóðavaktin því til fólks sem stundar útivist í bröttum hlíðum og á að vita af hættunni að vera ekki á ferðinni.

„Það þarf að fara varlega í brattlendi því þar er nýr snjór og einhverjir veikleikar og hafa flóð fallið. Núna erum við komin inn í tímabil þar sem fólk fer á fjallaskíði og vélsleða og þurfa þau að fara sérstaklega varlega núna.“