Kona í Utah deildi nýverið heldur saklausu myndbandi af sér og vinkonum sínum á samfélagsmiðlinum TikTok. Myndbandið sem er tekið upp á brúðkaupsdag konunnar, Katie Olsons Hart, sýnir hana ásamt brúðarmeyjum sínum í brennsluþolfimi að morgni brúðkaupsdagsins. Myndbandið hefur vakið harkaleg viðbrögð frá nettröllum.

Myndbandið sem ber titilinn „POV: It's your wedding morning“ sýnir brúðina klædda í hvítan íþróttatopp og samsvarandi stuttbuxur, þar sem hún leiðir um það bil 20 brúðarmeyjar í gegnum brennsluþolfimi. Allar brúðarmeyjarnar eru dökkklæddar.

Hart, sem giftist eiginmanni sínum, Jackson, í júlí í fyrra deildi myndbandinu af þessari heldur óhefðbundnu leið til að byrja brúðkaupsdaginn bara núna nýlega og bjóst alls ekki við öllum þeim neikvæðu viðbrögðum sem myndbandið hefur fengið í kjölfarið.

Myndbandið hefur verið skoðað yfir fjórum milljón sinnum og margir hafa ritað undir færsluna og sagt hvað þetta sé mikil vitleysa, að láta brúðarmeyjarnar stunda brennsluþjálfun, samdægurs brúðkaupinu. „Ef ég væri hluti af þessum hóp, myndi ég bara finna mér stað út í horni með mímósuna mína.”