Róbert Farestveit, hagfræðingur hjá ASÍ, segir að nú sé lag fyrir stjórnvöld til að stíga inn með öflugum hætti með stuðningi við uppbyggingu á óhagnaðardrifnu húsnæði. Þörfin í kerfinu sé mest á leiguhúsnæði.

Markaðurinn kallar á óhagnaðardrifnar íbúðir

Hann segir mikið af eignum vera á sölu um þessar mundir en það sé ekki það sem markaðurinn er að kalla á, heldur bráðvanti hagkvæmt leiguhúsnæði. Dýrt sé að reisa húsnæði í dag og hætt við því að verktakar haldi að sér höndum, sem geti búið til vandamál inn í framtíðina.

„Ríkið gæti þurft að stíga inn með mjög öflugum hætti til þess að jafna þau sveifluáhrif, með því að stuðla að uppbyggingu leiguhúsnæðis í gegnum óhagnaðardrifnar íbúðir. Þetta þekkist í öðrum löndum að mæta niðursveiflu í almennri verktöku með svona aðgerðum. Tækifærið er til staðar en ef menn eru ekki á verði þá mun ekki nást það markmið að byggja 35 þúsund íbúðir á næstu 10 árum.“

Óljós áhrif á kjaraviðræður

Nýjar tölur Hastofunnar frá því í dag segja til um að vísitala neysluverðs hafi hækkað um 0,39% frá því í síðasta mánuði. Róbert segir það að einhverju leyti í takt við væntingar, það að verðbólgan sé að hjaðna hægar haldið var í fyrstu. ASÍ spáir enn að hún verði um 7% í lok árs þótt Seðlabankinn sé svartsýnni.

Hann segir of snemmt að segja hvaða áhrif þetta muni hafa inn í kjaraviðræður í haust. Skipti þar miklu hvernig brugðist verður við í húsnæðismálum, sem eru sá þáttur sem verkalýðshreyfingin hefur mestar áhyggjur af, sérstaklega af stöðu þeirra sem nýverið hafa komið inn á markaðinn og stöðu leigjenda, sem mælist verri en annarra hópa.

Vöxtur í ferðaþjónustu breytir myndinni 

Eins hefur vöxtur í ferðaþjónustu áhrif á húsnæðismarkaðinn og ýtir enn á mannfjölgun. Seðlabankinn hafi getið þess í frávikum að þetta atriði gæti orðið ástæða frekari vaxtahækkana. Þetta flækir enn stöðuna en óumdeilt er í huga ASÍ að þörfin fyrir leiguhúsnæði er aðkallandi og stjórnvöld þurfi að grípa þar inn í.