Þetta áþreifanlega þarf ekki að vera eitthvað ógurlegt. Við erum kannski bara að tala um nýtt naglalakk sem gjörbreytir heildarmyndinni og lætur öll gömlu fötin líta út eins og ný. Á dögunum voru 17 nýir litir kynntir til leiks í Le Vernis línunni frá Chanel. Ljósgulur, ljósblár og appelsínurauður eru sérlega sumarlegir og minna svolítið á sjöunda áratuginn þegar konur voru með spangir í hárinu og iðuðu af kvenleika og bökunarlykt. Í línunni eru líka dökk vínrauður litur sem er kannski ekki sérlega sumarlegur. Ekki þannig, en hann fer hinsvegar mjög vel við hvít hörföt. Það þarf alltaf að vera einhver andstæða í heildarmyndinni. Hún má ekki vera eins og hún sé upplituð.

Talandi um upplitað fólk. Á dögunum hitti ég eina af þessum síungu konum sem virðast ekki eldast neitt þrátt fyrir að vera um sjötugt. Þegar ég minntist á það við hana að hún hefði ekki breyst neitt síðan ég man eftir henni, í meira en 30 ár, þá hló hún og spurði hvort ég þyrfti ekki að fara fá mér gleraugu. Hún væri nefnilega orðin svolítið upplituð. Upplituð, sagði ég og hló. Þetta fannst mér fyndið!

Upplitun er gott orð sem hægt er að nota um hluti af öllum stærðum og gerðum. Ég hef hinsvegar aldrei heyrt það notað um fólk. En kannski lýsti það bara svo vel hugarástandi á rigningardegi 46. Þegar okkur líður eins og við séum komin á síðasta söludag eins og gömul mjólk. Svolítið kekkjótt og illa lyktandi. Við erum þó full af bjartsýni, þrátt fyrir allt, og þrífum alltaf umbúðirnar áður en þær fara í endurvinnsluna. Ekki viljum við láta það spyrjast út að við hendum þeim beint í tunnuna með hinum óflokkaða úrganginum sem við setjum í plastpoka sem við kaupum í búðinni og skömmumst okkar ógurlega fyrir. Við viljum vera almennilegir borgarar og taka ábyrgð á okkur og umhverfinu. Eða þangað til við fréttum að það væri farið beint með fernunar yfir til meginlands Evrópu þar sem var kveikt í þeim. Stundum er svo flókið að vera til. Þegar þessar fréttir berast hefur varla sést til sólar í margar vikur. Þá þurfum við nýtt naglalakk og nýjan farða. Nýjan kjól, ný sólgleraugu og nýtt glit í kinnarnar.