Guðmundur Bernharð Flosason, eða Mummi eins og hann er oft kallaður, hefur sett glæsilegt einbýlishús sitt við Urðarás í Reykjanesbæ á sölu. Mummi er einn af eigendum Hvíta Hússins auglýsingastofu og er yfirumsjónahönnuður Icelandair. 

Rut Káradóttir innanhúsarkitekt innréttaði húsið sem er 229 fm að stærð og á tveimur hæðum. Mikill sjarmi er yfir húsinu sem reist var árið 2008, en þar spilar falleg og tímalaus hönnun lykilhlutverk.

Fallegt útsýni sem gleður augað

Í eldhúsi er stílhrein innrétting með góðu skápa- og vinnuplássi og fallegri eyju. Borðplata úr ljósum granít gefur rýminu mikinn glæsibrag, en það er svo opnanlegi búrskápurinn sem setur punktinn yfir i-ið.

Stofan er bæði björt og rúmgóð með aukinni lofthæð og gólfsíðum gluggum sem veita fallegt útsýni. Innbyggðar hillur grípa augað samstundis og gefa rýminu mikinn karakter, en þar ræður einfaldleikinn ríkjum og fá fallegir munir því að njóta sín til fulls í hillunum. 

Frá húsinu er glæsilegt útsýni yfir Fitjarnar, Reykjanes, Esjuna og Akrafjall. 

Sjá á fasteignavef mbl.is: Urðarás 9