Hér á landi virðist kjölfesta verðbólguvæntinga hafa laskast. Það gæti þýtt að erfiðara verði að ná tökum á verðbólgunni og gæti kallað á að draga þurfi úr efnahagsumsvifum áður en það tekst. Þetta kemur fram í nýju hefti Peningamála Seðlabankans.

Þar er greint frá því að þótt framboðshlið heimshagkerfisins virðist að mestu komin í eðlilegt horf eftir áföll undanfarinna ára, þá sé sem fyrr mikil óvissa um alþjóðlegar efnahagshorfur og hversu kostnaðarsamt það mun reynast að tryggja aftur verðstöðugleika í helstu iðnríkjum heimsins.

„Það á ekki síður við hér á landi enda virðist kjölfesta verðbólguvæntinga hafa laskast. Verðbólga gæti því reynst þrálátari en nú er spáð sem kalla myndi á meiri samdrátt innlendra efnahagsumsvifa til að ná tökum á henni á ný,“ segir í heftinu um stöðuna hér á landi.

Verðbólga mældist í síðasta mánuði 7,6% og lækkaði milli mánaða. Seðlabankinn segir þá lækkun hins vegar litast mjög af sterkum grunnáhrifum af miklum verðhækkunum sem áttu sér stað í júlí í fyrra, en sá mánuður var núna að detta út úr verðbólgutölunni, sem mælir 12 mánaða verðbreytingar.

Segir að undirliggjandi verðbólga mælist enn 6,7% og að áhrif innfluttrar verðhækkana hafi minnkað, m.a. vegna styrkingar krónunnar. Innlendar verðhækkanir hafi hins vegar reynst þrálátari.

„Launavísitala hækkaði um 10% milli ára á öðrum fjórðungi ársins og verð á dagvöru og almennri þjónustu hefur hækkað áfram. Þá hafa verðbólguvæntingar til meðallangs og langs tíma lítið breyst þótt hjöðnun verðbólgu í júlí hafi verið umfram væntingar. Verðbólguhorfur til lengri tíma hafa því lítið breyst frá því í maí,“ segir í Peningamálum.