Maður, sem hefur sænskan og rússneskan ríkisborgararétt og var handtekinn í Stokkhólmi í nóvember, hefur verið ákærður fyrir njósnir í Svíþjóð. 

Sergei Skvortsjov er sextugur og var lögregla með mikinn viðbúnað er hann var handtekinn á heimili sínu í Stokkhólmi í fyrra. 

Hann hefur verið ákærður fyrir „ólöglega njósnastarfsemi“ gegn Bandaríkjunum og Svíþjóð í áratug.

SVT greinir frá því að Skvortsjov hafi tengsl við rússnesku leyniþjónustuna GRU. Saksóknari telur að njósnir hans hafi ógnað öruggi Bandaríkjanna og Svíþjóðar verulega. 

Réttarhöld hefjist í næstu viku

Ákæran sem var lögð á hendur Skvortsjov í héraðsdómi er í tveimur liðum. Annar liðurinn snýr að njósnum gegn Svíþjóð og hins vegar gegn erlendu ríki, þ.e.a.s. Bandaríkjunum. 

Eiginkona hans var einnig grunuð um njósnir en fallið var frá rannsókn á hendur henni. 

Skvortsjov flutti til Svíþjóðar frá Rússlandi fyrir 25 árum og fékk sænskan ríkisborgararétt árið 2012. 

Skvortsjov neitar sök en saksóknari og lögregla munu halda blaðamannafund klukkan 13.30 á staðartíma vegna málsins. 

Áætlað er að réttarhöld í málinu hefjist 4. september og standi yfir í viku.