Listakonan Sísí Ingólfsdóttir hefur opnað sýningu á verkum sínum í Dýflissunni, nýju galleríi í kjallara bókabúðar Sölku. Birg­ir Örn Birg­is­son, Biggi lögga, lét sig að sjálfsögðu ekki vanta en Biggi og Sísí tilkynntu um trúlofun sína í sumar. 

Á sýningunni sýnir Sísí verk úr nýútkominni bók sinni, Hinni íslensku litabók, þar sem hún teiknar Ísland og Íslendinga frá spaugilegum sjónarhornum. Í litabókinni gefur Sísí sköpunargleðinni lausan tauminn en í henni má finna 54 myndir sem sýna íslenska náttúru, þjóðlíf, menningu og ýmis sérkenni íslensku þjóðarinnar. Í bókinni má meðal annars finna Víkinga í daglegu amstri, Kirkjufell undir norðurljósum, Gleðigönguna og fjallkonuna svo eitthvað sé nefnt. 

Eins og sjá má á myndunum vakti bókin og teikningarnar lukku hjá ungum sem öldnum.