Verbúðarballið var haldið um helgina í íþróttahúsi Gróttu á Seltjarnarnesi og lögðu sveitungar leið sína þangað ásamt gestum úr öðrum sveitafélögum. Íslenski sjónvarpsþátturinn Verbúðin var frumsýnd hjá Rúv í desember 2021 og sló þáttaröðin í gegn en hún gerist á níunda áratugnum. Þetta er annað árið í röð sem slíkt ball fer fram og var svo mikið stuð að það var ekki þurr þráður á fólki í lok kvöldsins. 

Gestir Verbúðarballsins tóku þemað alvarlega og mátti sjá grifflur, vafflað hár og legghlífar í öllu sínu veldi en slíkt þótti afar móðins á sínum tíma. 

Til þess að keyra upp stemninguna söng Ragnhildur Gísladóttir fyrir gestina ásamt Matta Matt. Bubbi Morthens var á dagskrá en hann afboðaði sig á síðustu stundu. 

Eins og sést á myndunum var frekar góð stemning enda fólk búið að fá sér svolitla bollu áður en hleypt var inn á ballið. Sumir borðuðu svolítið af brauðtertum líka en það er önnur saga.