Signý Kolbeinsdóttir, yfirhönnuður og annar stofnenda Tulipop, hefur sett ævintýralega eign sína við Grettisgötu í Reykjavík á sölu. Íbúðin er 133 fm að stærð og er á þriðju hæð í fjölbýlishúsi sem reist var árið 1949.

Íbúðin er greinilega heimili fagurkera og hefur verið innréttuð á afar skemmtilegan máta með ævintýralegu yfirbragði. Flotuð gólfin gefa eigninni mikinn sjarma og tóna vel við fagurgræna veggi í stofunni sem fanga augað. Djúpir og kröftugir litir eru í aðalhlutverki í rýminu en þar má einnig sjá stórar og tignarlegar grænar plöntur.

Mikil plöntuparadís er í íbúðinni sem er innréttuð á glaðlegan máta. Ljósmynd/Kristján Orri Jóhannsson

Sjarmerandi eldhús með hráu yfirbragði

Í stofunni má sjá hinn klassíska N701 sófa frá Ethnicraft sem Jacques Deneef hannaði. Þá hefur mismunandi stólum verið raðað við borðstofuborðið sem býr til skemmtilega stemningu, en þar má meðal annars sjá litríka Dar-stóla sem hjónin Ray og Charles Eames hönnuðu árið 1950.

Frá stofu er gengið inn í fallegt eldhús með hráu yfirbragði. Stílhrein svört innrétting með góðu skápaplássi prýðir eldhúsið en litagleðin fær að njóta sín í pottum og öðrum eldhúsáhöldum. 

Íbúðin státar af fimm svefnherbergjum og tveimur baðherbergjum, en íbúðinni fylgir útleigueining í risi. Ásett verð er 90,9 milljónir.

Sjá á fasteignavef mbl.is: Grettisgata 90

Eldhúsið er afar sjarmerandi. Ljósmynd/Kristján Orri Jóhannsson