Lyfjastofnun Íslands hefur ekki heimild til að forgangsraða lyfjabirgðum á Íslandi eða takmarka afgreiðslu lyfja. 

Þetta segir í skriflegu svari Lyfjastofnunar við fyrirspurn mbl.is um hvernig bregðast eigi við mikilli eftirspurn eftir sykursýkis- og þyngdarstjórnunarlyfjum á borð við Ozempic. 

Skortur hefur verið á sykursýkis- og þyngdarstjórnunarlyfjum í flokki GLP-1 um alla Evrópu og dæmi um slík lyf er Ozempic. 

Frétt af mbl.is

Áhyggjuefni að fólk fái ekki aðgang að lyfinu

Ozempic hefur notið mikilla vinsælda sem megrunarlyf um allan heim þrátt fyrir að eiga vera notað í meðferð við sykursýki 2, en það inniheldur efnið semaglútið sem hjálpar fólki við að stjórna blóðsykrinum sínum.

Þá hafa verið uppi miklar áhyggjur um að fólk sem þurfi á lyfinu að halda fái ekki aðgang að því vegna vinsælda. 

Lyfjastofnun hefur átt í samstarfi við Landspítalann til að auka líkur að fólk sem þurfi á lyfinu að halda fái aðgang að því. mbl.is/Jón Pétur

Í svari Lyfjastofnunar segir að stofnunin hafi „átt í góðri samvinnu innan heilbrigðiskerfisins, meðal annars við Heilsugæslu Höfuðborgarsvæðisins og Landspítala, til að auka líkur á að þeir sjúklingar sem þurfa mest á lyfjunum að halda hafi aðgang að þeim.“

Á mánudag fundaði Lyfjastofnun Evrópu um vandann sem fylgir mikilli eftirspurn eftir lyfinu og ræddi mögulegar aðgerðir til að sporna við vandanum. 

Ekki skortur en birgðir takmarkaðar

„Notkun GLP-1 lyfja til þyngdarstjórnunar hjá fólki sem ekki þjáist af offitu, og fólki í yfirþyngd sem er ekki með heilsufarsleg vandamál tengd þyngd, hefur verið reglubundið í umfjöllun í fréttum og á samfélagsmiðlum. Þetta hefur leitt til aukinnar eftirspurnar eftir sumum þessara lyfja, sem ásamt öðrum þáttum, svo sem takmörkum í framleiðslugetu, hefur leitt til skorts um alla Evrópu,“ segir í svari Lyfjastofnunar. 

Þá segir einnig að ekki sé skortur á lyfinu á Íslandi en þær birgðir sem berast reglubundið til landsins séu hins vegar takmarkaðar. 

„Því er beint til lækna að ávísa lyfjunum eingöngu skv. samþykktum ábendingum.“