Rósa Dan Johansen Þorláksdóttir er 23 ára gömul úr Garðabæ en hefur síðasta árið búið í Kaupmannahöfn. Hún lýsir sjálfri sér sem sjálfsprottnum, skapandi furðufugli og segist hafa fundið sig vel í dönsku höfuðborginni.

Fleiri tækifæri

Rósa býr í hjarta Kaupmannahafnar, þar sem hún hefur heillast af lifandi menningu, góðum félagsskap og afslöppuðu andrúmslofti en tískuheimurinn dró hana sérstaklega að.

„Hér er auðvelt að komast á milli staða, félagslífið er fjölbreytt, og fólk er opnara fyrir því að eignast nýja vini en heima á Íslandi,“ segir hún.

Rósa hefur fundið sér heimkynni í borginni og sér ekki fram á að snúa aftur til Íslands í bráð.

„Kaupmannahöfn er smá eins og stór útgáfa af Reykjavík og býður upp á fleiri möguleika og tækifæri.”

Rósa í blóma lífsins í borg sem býður upp á endalausa möguleika. Ljósmynd/Aðsend

Danska útgáfan af Húrra Reykjavík

Rósa starfar sem aðstoðarverslunarstjóri í Naked Copenhagen, sem hún lýsir sem „dönsku útgáfunni af Húrra Reykjavík.“ 

Hún ber ábyrgð á útliti og uppsetningu búðarinnar, auk þess að annast félagsmiðla búðarinnar.

„Það sem heillaði mig mest við þennan vinnustað er tengingin við tískuheiminn og skemmtilegt félagslíf,“ segir Rósa.

Rósa nýtur þess að kanna tísku Kaupmannahafnar. Ljósmynd/Aðsend

Skapandi og djarfur fatastíll

Rósa hefur frá unga aldri haft brennandi áhuga á tísku og hefur alla tíð verið framarlega í tísku og klæðaburði. Hún naut þess að hvetja vinkonur sínar til að fara út fyrir rammann og fann mikla gleði í því að velja klæðnað á þær.

Stíllinn hennar Rósu fer algjörlega eftir skapi. 

„Ég er gjörn á að breyta til og ég elska að prófa nýja hluti. Núna er ég sérstaklega hrifin af retró götutísku og víðum fötum, en mér finnst líka gaman að vera skvísa inn á milli.”

Rósa telur sig vera skapandi í klæðaburði og tekur því sem hrósi þegar einhver lýsir klæðnaði hennar sem óvenjulegum.

„Ef einhver segir að það sem ég er í sé undarlegt, þá veit ég að ég er að gera eitthvað rétt.“

Rósa hefur fjölbreyttan stíl og finnst gaman að fara út fyrir ramman. Ljósmynd/Aðsend

Daglegt líf og skemmtilegheit

Rósa hefur yfir sér líflegan blæ, og hennar venjulegu morgnar einkennast oft af flýti, þar sem hún þarf iðulega að hlaupa út til að mæta í vinnuna á réttum tíma – oft með hálfan fataskápinn í för með sér.

„Ég enda alltaf á að taka heila tösku af fötum með mér, því ég næ sjaldan að finna rétta dressið heima. Ég er með hálfan fataskápinn með mér í vinnunni.”

Eftir vinnudaginn nýtur Rósa þess að eyða tíma með sambýlisfólki sínu, þremur íslenskum stelpum og einum þýskum strák. Saman elda þau kvöldmat, spila spil eða rölta niður í bæ til að hitta vini.

Það er stanslaust líf og fjör hjá Rósu í Kaupmannahöfn. Ljósmynd/Aðsend

„Prófið að flytja erlendis!“

Fyrir þá sem heimsækja Kaupmannahöfn mælir Rósa með því að koma á sumrin. 

„Sumarið hér er best! Broens og Reffen eru frábærir staðir þar sem þú getur hoppað í sjóinn, notið matar úr matarbílum og slakað á með vinum,“ segir hún.

Að lokum hvetur Rósa alla til að prófa að flytja erlendis. 

„Heimurinn hefur svo margt upp á að bjóða og það er bæði gaman og lærdómsríkt að upplifa nýtt umhverfi. Það er svo auðvelt að festast í litlu búbblunni á Íslandi,“ segir hún að lokum.

Það er ekkert sem toppar danskt sumar. Ljósmynd/Aðsend

Alltaf í flottu dressi. Ljósmynd/Aðsend