Eigendur gleraugnaverslunarinnar Sjáðu, hjónin Anna Þóra Björnsdóttir og Gylfi Björnsson, eru stödd á Kanaríeyjum ásamt sonum sínum, Hinriki og Georg. Fjölskyldan dvelur á fimm stjörnu hóteli á Maspalomas og nýtur alls þess besta sem bærinn hefur upp á að bjóða.

Anna Þóra, þekkt fyrir glaðlyndi sitt, góðmennsku og húmor, vakti mikla athygli strandgesta í gærdag þegar hún spókaði sig um á ströndinni í Opal-sundbol úr fatalínu Hugleiks Dagssonar listamanns.

Blaðamaður heyrði hljóðið í Önnu Þóru og fékk að heyra um stemninguna sem ríkir á Kanarí, frekari ferðaplön og að sjálfsögðu söguna á bak við sundbolinn.

„Við erum bara að flýja kuldann, snjóinn og myrkrið. Það er yndislegt að byrja árið á heitari slóðum. Þetta er þvílík vítamínsprauta, allir ættu að fá einn flugmiða frá ríkinu til að byrja árið svona,“ segir Anna Þóra.

Anna Þóra og Gylfi ásamt sonum sínum. Ljósmynd/Aðsend

Var ferðin skipulögð með miklum fyrirvara?

„Nei, það er nú ekki hægt að segja það. Við ákváðum þetta í desember. Annar sona okkar var að útskrifast úr námi í Svíþjóð og flytja heim. Í stað þess að halda veislu ákváðum við í sameiningu að skella okkur frekar í sólbað.“

Hvað hafið þið verið að gera?

„Bara njóta, fara í nudd á hverjum degi, borða góðan mat og njóta samverunnar. Við erum á fimm stjörnu hóteli í afríkönskum stíl, með sundlaug í hverju horni. Það er nóg hægt að gera, hér eru krúttlegar búðir, allt voðalega þægilegt og gott.“

Er mikið af Íslendingum á svæðinu?

„Nei, alls ekki. Við höfum tvisvar rekist á Íslendinga. Ég var á Tenerife í fyrra og tek alveg undir orð Katrínar Halldóru Sigurðardóttur leikkonu sem lýsti staðnum sem hræðilegum. Að vera á Tenerife er eins og að vera í Kringlunni.“

Sérðu fyrir þér að setjast að á Spáni?

„Nei, ég er algjört fiðrildi og þarf alltaf að vera á flakki.“

Fjölskyldan naut sín á ströndinni. Anna Þóra í Opal-sundbol og sonur hennar í Bæjarins bestu-bol. Ljósmynd/Aðsend

Þú vaktir athygli fyrir skrautlegan sundfatnað þinn á ströndinni í gær, geturðu sagt mér aðeins frá sundbolnum?

„Já, heldur betur. Ég fékk þennan skemmtilega sundbol, sem er eins og blár Opal, í jólagjöf frá fjölskyldunni minni. Við keyptum jólagjafirnar hjá Hugleiki í fyrra. Ég reyni alltaf að versla jólagjafir af einhverjum listamanni, í hittiðfyrra fengu allir myndir eftir Prins póló.

Sundbolurinn sló í gegn hjá strandgestum, það brostu allir til mín. Ég held að blár Opal hressi, bæti og kæti.“

Fílar þú þig í bolnum?

„Já, algjörlega. Ég er mjög athyglissjúk og tek mig ekki hátíðlega. Ég get alveg gert grín að feitum maga, mjóum lærum og litlum rassi. Ég er ekki akkúrat í tísku þessa öldina en ég tel mig bara heppna að fá að vera 62 ára að leika í sólinni.“

Ertu með einhver spennandi ferðaplön fram undan?

Já, ég ætla að fara til Ítalíu í febrúar, kem heim í eina viku og held svo út á gleraugnasýningu í Mílanó. Ég ætla að nýta tækifærið og heimsækja ítalska vinkonu mína. Ég er ekki með annað staðfest en mig langar að heimsækja Japan, Taíland og Búenos Aíres sem fyrst.“

Anna Þóra dýfði tánum í sjóinn. Ljósmynd/Aðsend