Tónlistarmaðurinn Friðrik Róbertsson, betur þekktur undir listamannsnafninu Floni, hugðist fá tónlistarmanninn Daniil til að syngja inn á nýtt lag hjá sér á dögunum. Það reyndist hins vegar vera saklaus hrekkur, en Floni segir lagið hafa verið hræðilegt og markmiðið að sjá viðbrögð Daniil.

Átti erfitt með að halda andliti

Í TikTok-myndbandinu sem Floni deildi með aðdáendum sínum, sem er hér fyrir neðan, má sjá Flona kynna Daniil fyrir laginu með alvarlegu yfirbragði og biðja hann um að slást í lið með sér. Viðbrögð Daniils voru eftir því – hann virtist ringlaður yfir ástandinu.
Hann lét þó ekki blekkjast lengi og endaði á að spyrja hvort ekki væri hægt að gera einhverjar lagfæringar á laginu.

Fólk í athugasemdunum virtist þó sammála um að lagið væri í raun gott og hvetur þá félaga nú eindregið til að gefa það út.