Halla Gunn­ars­dótt­ir, nýkjörinn formaður VR, segir óboðlegt að millitekjufólk geti ekki mætt óvæntum gjöldum heimilisins, eins og þvottavélaviðgerðum. Það eigi að geta lagt fyrir og mætt óvæntum útgjöldum.

„Þannig að þetta er eitt af þeim viðfangsefnum sem ég tek með mér úr þessari kosningabaráttu, og þarna skiptir húsnæðiskostnaður allra mestu. Það er auðvitað stóra kjaramálið,“ segir Halla í samtali við mbl.is.

Þá segist hún samgleðjast kennurum – þeir hafi háð sína baráttu og náð sínum kjarasamningum – hún sé þó ekki þeirrar skoðunar að þegar einn sé búinn að semja verði allir aðrir að semja eins.

Frétt af mbl.is

Halla kjörin formaður VR

VR standi frammi fyrir stórum verkefnum

Í gegnum kosningabaráttuna hefur Halla sagst vera „frekar gamaldags“ í áherslum sínum, en hún hefur verið að vinna með slagorðið „kaup og kjör“.

Aðspurð segir hún stóra verkefnið vera að fylgja eftir þeim kjarasamningum sem voru undirritaðir í fyrra. Þá ætlar hún sérstaklega að leggja áherslu á húsnæðismál. 

„Ég vil tryggja og fylgja því eftir að það séu ekki einhverjar verð- og gjaldskrárhækkanir sem að læðast aftan að okkur.“

Undirbúning fyrir næstu kjarasamninga segir hún byrja í apríl eftir aðalfund VR, „þangað þurfum við að koma mjög samhent, með skýrar kröfur og vel undirbúin“.

Þá segir hún félagið VR standa frammi fyrir stórum verkefnum á næstunni. Fram undan sé umfangsmikil skipulagsvinna í félaginu og taka þurfi fyrir skipulag og deildir félagsins.

„Þetta er vinna sem ég hlakka til að leiða og takast á við með félögum mínum í stjórn.“

Fólk með millitekjur eigi að geta haft það ágætt

„Mín skoðun er sú að kennarar háðu sína baráttu á sinn hátt og náðu sínum kjarasamningum og ég bara samgleðst þeim í því. Ég er ekki þeirrar skoðunar að þeir sem semji á undan geti læst alla aðra inni. Ég tel að það sé ekki gott fyrir vinnandi fólk,“ segir Halla, spurð hvort hún telji samninganefnd hafa farið fram úr sér í kjarasamningi kennara.

Telur þú verslunar- og skrifstofustarfsfólk hjá VR eiga svipað inni og talið var að kennarar gerðu?

„Ég er búin að eiga samtöl við þúsundir VR-félaga á síðustu vikum og búin að fara inn á mörg hundruð vinnustaði að spjalla við fólk sem hefur verið ótrúlega lærdómsríkt og gefandi og gerir mig að betri formanni en ég hefði orðið ef ég hefði ekki farið í gegnum þessa kosningabaráttu.

Eitt af því sem ég hef lært þar, og ég hef hitt oftar en einu sinni og oftar en tvisvar, fólk sem tilheyrir millitekjuhópum, og jafnvel þar sem eru tvær fyrirvinnur með millitekjur á einu heimili, en lenda samt í svaka veseni ef þvottavélin bilar. Það er ekki bara vesen þessi heldur líka næstu mánaðamót.“

Segir hún slíkt ekki eiga að gerast, fólk með millitekjur eigi að geta haft það ágætt. Oft sé þetta fólk sem sé komið upp í hæstu tekjur á sínum starfsferli sem það mun hafa yfir starfsævina, það eigi að geta lagt fyrir og mætt óvæntum útgjöldum.

„Þannig að þetta er eitt af þeim viðfangsefnum sem ég tek með mér úr þessari kosningabaráttu, og þarna skiptir húsnæðiskostnaður allra mestu. Það er auðvitað stóra kjaramálið.“