Bandaríski leikarinn Patrick Schwarzenegger og unnusta hans, fyrirsætan Abby Champion, fara með aðalhlutverk í nýrri auglýsingaherferð nærfatamerkisins Skims, sem er í eigu raunveruleikastjörnunnar og athafnakonunnar Kim Kardashian.

Nýjasta undirfatalína Skims er svokölluð brúðkaupslína og eru nærfötin með rómantísku og eggjandi ívafi, fullkomin fyrir brúðkaupsnóttina.

Frétt af mbl.is

Skims kynnir nýjar aðhaldsbuxur sem stækka afturhlutann

Á myndunum klæðist Champion fallegum hvítum blúndu- og silkinærfötum og Schwarzenegger, í hlutverki brúðguma, stendur henni við hlið klæddur í smóking og með þverslaufu.

Öruggur í eigin skinni

Ein mynd af unga parinu hefur þó vakið sérstaka athygli á Instagram-síðu Skims, en á þeirri mynd er Schwarzenegger kviknakinn og með hvítan brúðarvönd til að hylja sitt allra heilagasta.

Schwarzenegger er öruggur í eigin skinni og ófeiminn við að koma nakinn fram eins og aðdáendur nýjustu seríu The White Lotus komust að. Leikarinn, sem fer með hlutverk Saxon Ratcliff, sprangaði um nakinn í fyrsta þætti seríunnar, mörgum til mikillar ánægju.

Schwarzenegger, 31 árs, og Champion, 28 ára, eiga tíu ára sambandsafmæli í ár og ætla að fagna með því að ganga í hjónaband síðar á árinu.

Frétt af mbl.is

Cardi B elskar nærfatalínu Kardashian