„Oft eru þetta mjög valdamiklar konur sem hafa mikla stjórn í sínu starfi og svo labba þær kannski inn heima hjá á sér í fína einbýlishúsið og þar hafa þær engin völd,“ lýsir Linda Dröfn Gunnarsdóttir, framkvæmdastýra Kvennaathvarfsins, í Dagmálum. 

Söfnun Á allra vörum fjáröflunarátaksins er til umræðu í þættinum þar sem sjónum er beint að byggingu nýs Kvennaathvarfs. Ásamt Lindu Dröfn mættu tvær af þremur forsvarskonum átaksins í þáttinn, þær Guðný Pálsdóttir og Elísabet Sveinsdóttir, og sögðu frá því hvernig hugmyndin að málefninu í ár kviknaði.

Frétt af mbl.is

Vægari dómur fyrir að myrða konu í heimahúsi en úti á götu

Ofbeldið óháð stétt og stöðu

Sé tekið mið af þeim þolendum sem leitað hafa til Kvennaathvarfsins þá hefur enginn samnefnari fundist um algengi ofbeldis út frá því hvaða stétt eða stöðu þolendur tilheyra sem verða fyrir slíku. Heldur er ofbeldi í nánum samböndum mikið samfélagsmein sem þrífist innan allra samfélagshópa, óháð stétt eða stöðu, að sögn Lindu Drafnar. Hún bendir þó á að oft verði jaðarsettar konur frekar fyrir barðinu en ekki vegna bágra aðstæðna. 

„Það er enginn hópur sem við sjáum að stendur út úr. En við sjáum náttúrulega að sumar konur eru í sérstaklega viðkvæmri stöðu, konur sem eiga ekki sitt heimili sjálfar, konur af erlendum uppruna og fatlaðar konur sem auðveldar er að beita ofbeldi. Þær hafa ekki jafnmikið tengslanet eða mikil völd yfir eigin ákvörðunum eða slíkt, en annars er enginn rauður þráður,“ segir Linda.

„Aftur á móti er rauður þráður í ofbeldinu.“ 

Þú þarft engan nema mig

„Rauði þráðurinn er að ná völdum og stjórn yfir hinum aðilanum með öllum mögulegum ráðum. Fyrsta skrefið er langoftast einangrun, að einangra þolanda frá tengslanetinu sínu: „Þú ert alltaf svo leiðinleg þegar þú ert í kringum mömmu þína og vinkonur þínar eru voðalega skrýtnar“ eða hvað það er,“ segir Linda og tekur dæmi um setningar sem gerendur segja gjarnan til að ná stjórn og einangra þolendur frá fjölskyldu og vinum.

Frétt af mbl.is

„Barnið svaf samfleytt í þrjá sólarhringa“

„Þetta getur verið rosalega lúmskt og mikið „love bombing“ eins og það er kallað. Gerandinn tekur svolítið yfir og fyllir upp í öll svæði og er alltaf til staðar, ég er nýi fyrsti aðilinn í þínu lífi og þú þarft engan nema mig,“ lýsir Linda einkennum andlegs ofbeldis enn frekar. 

Hún segir stjórnsemi undirstöðu ofbeldis í nánum samböndum en að sama skapi upplifi gerendur sig oft sem þolendur. Því geti verið vandasamt að koma ofbeldismönnum í skilning um misneytinguna sem þeir beita þannig að þeir taki ábyrgð á eigin hegðun.

„Þú ferð að efast um sjálfan þig öllum stundum og trúa því að þetta sé þér að kenna - þú ert bara vandamálið.“

Smelltu á hlekkinn hér að neðan til að nálgast viðtalið í heild sinni.

Algengt að konur festist í viðbjóðslegum ofbeldishring

Sjúkleg stjórnsemi er stór þáttur ofbeldis í nánum samböndum. Ljósmynd/Pexels/Karolina Grabowska