Formaður Starfsgreinasambandsins sakar stjórnvöld um svik við kjósendur þar sem hann telur afnám samsköttunar hjóna og sambýlisfólks vera skattahækkun dulbúna sem einföldun.

Rík­is­stjórn­in hef­ur lagt til í fjár­mála­áætl­un að af­nema sam­skött­un hjóna og sam­býl­is­fólks milli skattþrepa. Í fjár­mála­áætl­un rík­is­stjórn­ar­inn­ar seg­ir að eitt af mark­miðunum sé að bæta skatt­skil, loka gluf­um og fækka und­anþágum.

Vilhjálmur Birgisson, formaður Starfsgreinasambandsins, segir að í raun sé um að ræða skattahækkun upp á 2,5 milljarða króna.

„Þetta eru ekki smámunir – þessi fjárhæð jafngildir fjórðungi af fyrirhuguðum hækkunum á veiðigjöldum,“ skrifar verkalýðsleiðtoginn á Facebook.

Frétt af mbl.is

Afnema samsköttun: Segir fjölskyldum refsað

Svik við loforð

Enn alvarlegra sé að stjórnarflokkarnir hafi lofað í síðustu kosningum að tekjuskattar einstaklinga yrðu ekki hækkaðir.

„Nú, rúmlega 100 dögum síðar, er boðuð breyting sem felur í sér nákvæmlega það sem lofað var að gera ekki: hækkun á skattbyrði heimilanna,“ segir Vilhjálmur.

Hann segir það rangt að halda því fram að breytingin hafi aðeins áhrif á efstu tekjutíundir, heldur lendi hún einnig harkalega á skuldsettum barnafjölskyldum „þar sem annað foreldrið vinnur jafnvel tvær vinnur eða mikla yfirvinnu til að ná endum saman, á meðan hitt sinnir börnum eða er í hlutastarfi“.

Þessi heimili hafi hingað til getað dreift skattbyrðinni á milli sín með sameiginlegri nýtingu skattþrepa, en sú leið verður nú lokuð.

„Það þarf að fara fram alvöru greining á áhrifum þessarar breytingar, áður en lengra er haldið. Því eitt er alveg ljóst: þetta er skattahækkun – og hún er ekkert annað en svik við kjósendur.“