Fulltrúafundur Félags framhaldsskólakennara mótmælir harðlega sparnaðaráformum ríkisins á framhaldsskólastigi, sem birtast í fjármálaáætlun fjármála- og efnahagsráðherra fyrir árin 2026-2030.

Félag framhaldsskólakennara leggur fast að fjármála- og efnahagsráðherra ásamt ríkisstjórninni allri, fjárlaganefnd, allsherjar- og menntamálanefnd og öllum þingmönnum að tryggja að framhaldsskólastigið verði fjármagnað sómasamlega á næstu árum svo að einhver von sé um að metnaðarfull stefna stjórnvalda í málaflokknum til ársins 2030 nái fram að ganga.

Þetta kemur fram í ályktun fundarins frá því á mánudag.

Frétt af mbl.is

Boða sókn í menntamálum en skera niður á sama tíma

Í besta falli undarleg áform

Segir í ályktuninni að fjármálaáætlun geri ráð fyrir meira en 5% niðurskurði á tímabilinu til framhaldsskólastigsins og að áform um svo harkalegan niðurskurð til málaflokksins séu í besta falli undarleg í ljósi þess að von sé á fjölmennum árgöngum inn í framhaldsskóla landsins á næstu fimm árum.

„Á næstu tveimur árum eru líkur til þess að nemendum fjölgi hér um bil um 650 nemendur, sem samsvarar einum meðalstórum framhaldsskóla,“ sem segir í ályktun fulltrúafundarins.

Fulltrúafundurinn bendir á að á næstu tveimur árum séu líkur til þess að framhaldsskólanemum fjölgi um það bil um 650 nemendur hér á landi. Graf/Hagstofa Íslands

Telur fundurinn fyrirhugaðan niðurskurð alls ekki ríma við stefnu stjórnvalda í málaflokknum en t.a.m. sé stefnt að því að fjölga nemendum í iðn- og verkgreinum og það nám sé mun dýrara en annað nám.

Einnig sé ráðgert að koma í ríkara mæli til móts við sífellt fjölbreyttari nemendahóp hvað varðar tungumála- og menningarbakgrunn, námsstöðu og sérþarfir, meðal annars með aukinni íslenskukennslu og öðrum farsældarstuðningi.

Frétt af mbl.is

Stefnuyfirlýsing ríkisstjórnarinnar í heild sinni

Verði að geta staðið undir lögbundnu hlutverki sínu

„Framhaldsskólastigið verður að geta staðið undir lögbundnu hlutverki sínu, sem er að bjóða öllum nemendum nám við hæfi með velferð og farsæld að leiðarljósi. Vandséð er að það náist ef fyrirhugaður niðurskurður verður að veruleika.

Félag framhaldsskólakennara leggur fast að fjármála- og efnahagsráðherra ásamt ríkisstjórninni allri, fjárlaganefnd, allsherjar- og menntamálanefnd og öllum þingmönnum að tryggja að framhaldsskólastigið verði fjármagnað sómasamlega á næstu árum svo að einhver von sé um að metnaðarfull stefna stjórnvalda í málaflokknum til ársins 2030 nái fram að ganga.“