Hinn eini sanni Laddi hefur sent frá sér nýtt lag ásamt Hljómsveit mannanna. Lagið heitir 19 gráður og er óður til sumarsins og þess sem vænta má á næstu vikum.

Laddi og Hljómsveit mannanna hafa ferðast um landið undanfarin tvö ár og leikið á tónleikum bestu lög Ladda ásamt því að hafa gefið út tvö lög, en 19 gráður er það þriðja sem hópurinn gerir saman.

Áður hafa komið út lagið Tíminn og endurgerð á laginu Mamma.

Laddi, sem heitir réttu nafni Þórhallur Sigurðsson, er nú á fullu við að kitla hláturtaugar leikhúsgesta Borgarleikhússins í sýningunni Þetta er Laddi, en Hljómsveit mannanna er í startholunum og bíður þess að túra með Ladda á ný þegar glufur myndast.

Það er að minnsta kosti ljóst að Laddi er hvergi nærri hættur í tónlistinni en lagabálkur hans telur fleiri hundruð laga og eru mörg hver gríðarlega vinsæl.